SUPERBALITA CEBU

Tambagi ko Noy Kulas: Naanod sa tentasyon

DEAR Noy Kulas,

Please i-hide lang ang akong true name. Tawga lang ko og Kyla. Ang akong problema ang akong situation karon.

Minyo ko ug ang akong bana toa sa abroad na-delayed og uli tungod sa Covid. Tungod ra sa Covid ang akong problema nga nahimong komplikado.

Ang akong ig-agaw dunay kauban sa trabaho nila nga wa makauli sa Mindanao kay naabtan sa ECQ. Naa na puyo sa ilaha since sa first week sa April. Didto ra mi magkaila-ila kay gi-introduce sa akong cousin lagi. Magsuroyan na siya sa amoang balay hangtod nga nagkasuod mi. Didto nako nahibaw-an nga toa sa abroad ang iyang asawa ug di sila maayo og relationship. Daghan siya og gisulti nako hangtod nga naluoy ko niya.

Naay higayon nga nihilak siya atubangan nako ug naluoy kaayo ko niya. Ako siyang gialam-alaman ug gigakos. Ambot ba, nag-kiss na man hinuon mi ug dunay nahitabo namo. Moangkon ko nga uhaw ko aning butanga ug mao to, dali ra kong gianod sa kalipay nga nasundan pa. Karon, na worried ko kay adtong April, wa na ko tungahi sa akong monthly until aning akong pagsuwat. Di kaha ko mabdos? Kon mabdos ko, unsa kahay akong buhaton kon mauli na ang akong bana human aning Covid? Please tambagi k okay nahadlok na ko og maayo.

KYLA

Kyla,

Naa bitaw usahay nga di ka lang magdahom, kalit kang natumba, natarog sa tentasyon. Sa ginaingon pa, tawo lang kita, naay panahon nga madakin-as. Usahay, grabe ang pagkalamba kay lisod nang ibangon. Sama ani karon nga posibleng mabdos ka human ninyo saw-i ang kalipay sa kama. Ang bati pa kay diha sa inyong balay nahitabo ang tanan.

Kon unsa man gani, atubanga ang bisan unsang bagyo nga moabot sa imong kinabuhi kay ang tanan, bisan unsa man ka bangis sa hitabo nga moabot, duna kini kinutoban. Busa, ayaw paghimo og lakang nga basin imong pagamahayan. Kon mabdos ka, angkuna atubangan sa imong bana bisan unsa man ang consequences.

Sa ako nang giingon, molabay ra ang problema. Grabe man ang moabot, apan molabay ra kini sama sa bagyo. Pag-ampo sa Ginuo nga hatagan ka og kusog ug kaisog sa pag-atubang sa mga problemang moabot.

NOY KULAS


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph