SUPERBALITA CEBU

Sugilanon: Nabanhaw si Kristabel

LAMBERTO G. CEBALLOS

Cawayan, Dalaguete, Cebu


GIKAN si Danilo sa Cinema 1 sa SM City Cebu. Nitan-aw siya sa salida nilang Daniel Padilla ug Kathryn Bernardo nga Barcelona. Samtang siya naglakaw sa hawanan sa mga nagkadaiyang tindahan sa Mall nalantawan niya didto sa atbang nga hawanan ang usa ka babaye nga sinati niya kaayo ang panagway. Si Kristabel. Di gyud siya masayop. Si Kristabel gyud ang iyang nakita nga naglakaw paingon sa eskaletor padulong sa ubos nga lebel. Nagdali siya nga mipaingon sa eskaletor aron agpason ang babaye. Apan wa na niya kini maapsi ug natigwalaan na sa iyang panan-aw.

Misantop karon sa iyang hunahuna nga dili kadto si Kristabel. Tulo na ka tuig nga mitaliwan si Kristabel. Sumala sa inahan ni Kristabel, si Mrs. Rosa Deleon, didto kini mamatay sa Canada diin siya nag-alagad isip nars sa usa ka ospital didto. Basin og kamay-ong o kaamgid kadto ni Kristabel, kay dinhi baya sa kalibutan sa mga buhi ang usa ka tawo may kaamgid gayud. Nahinumdom gani siya sa miaging tuig kanus-a ang Showtime sa ABS-CBN nagpa-kontes og Lookalike. Daghan ang nangapil nga kamay-ong sa mg ‘celebrity’, sama nilang Christopher de Leon, Joey de Leon, Angel Locsin, Katy Perry, ubp.. Unya sa ‘finals’, ang kamay-ong ni Vice Ganda ang midaog, kay ang iyang hitsura ug pamayhon amgid kaayo sa kang Vice Ganda. Mora silag pinikas nga bunga sa mansanas.

Uyab ni Danilo si Kristabel. Wala sila magkabuwag hangtod migikan kini paingon sa Canada nga wa magpahibawo kaniya. Nahiubos kaayo siya kang Kristabel ug kini iyang gipadayag sa dalaga pinaagi sa ilang panagsultianay pinaagi sa Skype sa ilang selpon. Niingon si Kristabel nga wa siya magpahibawo kang Danilo aron dili siya dag-on sa kawili nga mobiya sa ulitawo ug dili na hinuon mahinayon ang iyang biyahe. “I love you, Dan! It hurt me to leave you!” matod ni Kristabel. “But it hurt me more when I learned from your mother that you’re already in Canada!” tubag ni Danilo. Miingon si Danilo nga inig pauli ni Kristabel sa Pilipinas magpakasal sila. Misugot ang dalaga ug misaad nga dili makig relasyon og laing lalake samtang tua siya sa Canada. Apan paglabay sa usa ka tuig gisultian si Danilo ni Kristabel, pinaagi sa Skype, nga naminyo kini og Amerikanong doktor ug nga kalimtan na lang siya sa hingpit. “I know you’ll find someone who’ll love you more than I do!” matod ni Kristabel. Mao kini ang katapusan nilang panagsultianay ni Kristabel. Paglabay pod sa usa pa ka tuig nag-teks si Mrs. Rosa Deleon kaniya nga ‘wala na’ si Kristabel; namatay kini sa ‘breast cancer.’ Nakahilak niadto si Danilo.

Tulo na ka tuig nga namatay si Kristabel. Kinsa man kadtong nakita niya nga nanaog sa eskaletor paingon sa ubos? Kalag kaha ni Kristabel? O mugna lang sa iyang panan-aw? Nagpanglingo siya nga milahos ‘parking bay’ sa Mall aron mopauli sakay sa iyang awto.

Usa ka gabii sa mga alas onse ang takna gipukaw si Danilo sa sagunson nga tunog sa iyang selpon. Kinsa kaha kining namukaw sa lawom nang gabii? Gi-klik niya ang Skype. Nakita niya ang ‘image’ ni Kristabel sa ‘wall’ sa iyang selpon nga nagkatawa. Gikulbaan siya. Nagmulto si Kristabel kaniya. Misulti kini, “Hai, Dan! Kumusta?” Nagkurog si Danilo nga mitubag, “Ikaw ni, Krista? Ingon Mama mo patay ka na human maminyo!” Mitug-an si Kristabel nga mugna ra kadto ni Mama niya aron di si Danilo makasamok sa iyang (Kristabel) nga panarbaho sa Canada, nga giuyonan pod niya. Gisultian pod ni Danilo si Kristabel nga may nakit-an siyang usa ka babaye nga kamay-ong ni Kristabel sa SM City sa miaging semana. Mitug-an si Kristabel nga siya kadto ug naanugnan nga wala sila magkita.

“Magkita ta ugma, Krista. Moanha ko sa inyo. Sabutan nato ang atong kasal. Okey?” ni Danilo. “Nabanhaw ka alang sa tiunay tang gugma. I love you so much!”

“Okey. Sugot na man si Mama nga magminyo ko! I love you, too, Dan!” ni Kristabel.

Unya nagbinayluay silag mga ‘flying kiss’ sa Skype.

(KATAPUSAN)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph