SUPERBALITA CEBU

Barrita: Balaudnon kontra terorismo

Tipik sa balaod

GIPASAR sa second reading niadtong Martes sa House of Representatives ang House Bill No. 6875, ang giproponer nga Anti-Terrorism Act of 2020. Ang maong balaudnon nagsagop sa Senate Bill No. 1083 nga gipasar sa Senado niadtong Pebrero.

Mao kini ang mohulip sa Republic Act No. 9372, ang Human Security Act of 2007 RA9372, nga matod pa ni Senador Panfilo “Ping” Lacson, usa ka “dead letter law” ug wa gamita sa militar ug kapulisan batok sa terorismo.

Ngano man? Nagdumili ang militar ug kapulisan sa paggamit sa maong balaod batok sa mga suspetsadong terorista tungod sa probisyon nga ang usa ka akusado nga maabsuwelto pabayran og P500,000 sa matag adlaw nga pagkabilanggo niya.

Tungod niini, ang mga kaso nga gipasaka batok sa mga suspetsadong terorista mao lang ang paglapas sa Revised Penal Code ug sa ubang mga balaod sama sa murder, illegal possession of explosives ug illegal possession of firearms.

Ang maong balaudnon gisertipikahan nga urgent ni Presidente Rodrigo Duterte niadtong Lunes, Hunyo 1. Mas dali ang pagpasar niini, labi na nga ang balaudnon nga gipasar sa Senado gisagop sa House of Representatives. Pareho ra, busa di na kinahanglan ang bicameral conference.

Giduso kining maong balaudnon ni Defense Secretary Delfin Lorenzana ug sa ubang mga opisyal kay giila nga ang existing nga balaod kontra terorismo way ngipon. Apan gisupak kini sa mga human rights groups ug mga magbabalaod sa oposisyon kay alang kanila mahimo kining gamiton sa pagyatak sa mga tawhanong katungod.

Ubos sa Senate Bill 1083, ang usa ka suspetsadong terorista mahimong prisuhon bisan way warrant of arrest sud sa 14 ka adlaw ug mahimong lugwayan og laing 10 ka adlaw imbis sa tulo ka adlaw. Mahimo usab silang ibutang sa surveillance sud sa 60 ka adlaw ug mahimong lugwayan og laing 30 ka adlaw.

Giila nga terrorist acts ang pagtisok og kahadlok pinaagi sa pagpatay, pag-angol ug pagbutang sa peligro sa kinabuhi sa laing tawo; paghimog kadaot sa usa ka public facility ug critical infrastructure; pagmugna, paghupot, pag-transport o paggamit sa mga armas, eksplosibo ug mga biological, nuclear, radiological or chemical weapons; ug paggamit sa dangerous substances nga makahimog sunog, pagbaha ug explosions.

Kadtong mga tawo nga mosugyot, moaghat, makigkonsabo ug mosalmot sa pagplano, pagbansaybansay o paglusad sa usa ka terrorist attack mag-atubang sa sentensya nga tugbang sa life imprisonment without parole. Samang silot ipahamtang niadtong mosuportar ug mo-recruit og mga sakop sa usa ka terrorist organization.

Samtang silot nga pagkapriso sa 12 ka tuig ipahamtang niadtong mohulga sa paghimog terorismo, moawhag sa uban nga maghimog terorismo, magpasakop sa usa ka pundok nga iyang nahibaw-an nga usa ka terrorist group or association ug usa ka accessory sa paghimo sa krimen nga terrorism. (edbarrita@gmail. com)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph