BANAY nga Rama gustong mobalik pagdominar sa pulitika sa Sugbo.
Nagduda si kanhi Senador Sonny Osmeña nga kini ang plano sa mga Rama dinhi sa Sugbo hinungdan nga ilang gipaningkamutan nga makalingkod sa posisyon isip mayor si Bise-Mayor Michael Rama.
Si Osmeña, nga modagan pagkamayor sa dakbayan sa Sugbo, nga nahinabi sa Dyrf Radyo Fuerza, niingon nga nakadawat siya og impormasyon nga mobalik sa Sugbo ang mga Rama nga atua magpuyo sa kaulohan ug sa laing nasod aron mosuportar sa kandidatura sa bise-mayor.
“Gatuo ka nga buhian pa (pagkamayor) sa mga Rama? Ilabi na og makalingkod na si Mike?,” matod ni Osmeña.
Dugang pa niya nga dako ang posibilidad nga ang gibuhat kanhi ni kanhi mayor Alvin Garcia mao usab ang buhaton ni Rama kon siya na ang makalingkod.
Matod pa ni Osmena nga sa dihang gipadagan og mayor ni Mayor Tomas Osmeña si Garcia, di na hinuon kini gustong manaog, hinungdan nga napugos sa pagbalik og dagan si Mayor Osmeña.
“It’s very logical nga nakahupot ka na pagkamayor sa siyudad, imo gihapon kining iuli? Kana maoy wa tan-awa ni Tomas nga posibilidad,” nagkanayon si kanhi senador Osmena.
Iyang giawhag ang iyang ig-agaw nga mayor nga siya ang suportahan sa pagkamayor aron magpabilin silang mga Osmeña sa natad sa politika sa Sugbo.
Andam usab siyang mokanaug sa pagka Mayor kon ugaling gusto mobalik si Mayor Osmena sa pagdumala sa siyudad.
Apan daan nang nitubag ang mayor nga di gyud siya mosuporta sa iyang ig-gaw.
Ang Sun.Star Superbalita nisuway pagkuha sa habig ni Rama, apan wa kini motubag sa mga tawag sa cell phone.
Ang banayng Rama maoy usa sa mga lumad nga taga Sugbo. (JFT)