UNOM ka mga bata ang gipangdakop sa kapulisan tungod sa pagpangawat.
Ang mga bata nasakpang nangawat sud sa usa ka farm nga iya sa usa ka huwes.
Ang mga batang lalake nga nagpanuigon gikan sa 10 ngadto sa 17-anyos, giingong nangawat og rolyo sa electric wire sa farm ni Judge Romulo Senining sa Sitio Patag, Barangay Argaoanon, San Remigio, Cebu.
Mga caretaker nga sila si Grace Albana ug Ricardo Moraca nakakita sa mga bata sud sa farm.
Ila gyud nga nadakpan ang usa sa mga bata nga nagpanuigon og 13-anyos.
Nakadagan ang mga kauban niini dala ang usa ka rolyo sa electric wire no. 8 nga balor og P6,000.
Sila si Moraca ug Albana nidala sa bata ngadto sa police station.
Usa ka police team nga pinangulohan ni PO3 Joe Juhnnesky Ynot nipahigayon og hot pursuit operation ug nasikop ang mga bata.
Hinuon, usa sa mga bata gibuhian human ang iyang inahan nakapakita sa baptismal certificate aron pagmatuod sa iyang edad ngadto Department of Social Welfare and Development.
Ubos sa Juvenile Justice Act, ang mga bata nga ubos sa 15-anyos way tulubagong kriminal. (MEA sa Sun.Star Cebu)