NAGTINGUHA ang National Basketball Association (NBA) nga humanon ang ilang 2019-2020 season karong Oktubre 12, 2020.
Mao kini ang nalantawan sa NBA human hinayhinay nang nahan-ay ang pagbalik sa ilang mga duwa nga nahunong niadtong Marso, 2020 gumikan sa coronavirus disease 2019 (Covid-19).
Ang NBA ug ang NBA Players Association padayon na sa pag-finalize sa tanang mga detalye kabahin sa pagbalik sa aksyon sa liga.
Sa taho sa ESPN, ang NBA nagplano nga mopahigayon og 22-team format sa ilang pagbalik karong Hulyo 31, 2020.
Gilauman nga ang tanang mga duwa ipahigayon sa Disney ESPN Wide World of Sports Complex sa Orlando Florida aron paglikay sa Covid-19 outbreak.
Ang kining mga plano, nga gisugyot ni Commissioner Adam Silver, nagkinahanglan nga maaprubahan sa board karong adlawa. Gituohan nga matugotan kini gumikan kay gihugonhugon nga nagkauyon niini ang kadaghanan sa 30 ka tag-iya og teams.
Usa sa labing importante nga isyu nga kinahanglang sulbaron mao ang format nga tumanon alang sa pagdeterminar sa 16 ka teams nga makaabante sa playoffs.
Pagkahunong sa liga, niadtong Marso 11, 2020, walo sa 30 ka teams ang wala nay poruhan sa playoffs hinungdan nga dili na kini paapilon inig balik sa aksyon sa liga.
Si Atlanta Hawks coach Loyd Pierce, kansang puwersa usa sa mga wala na’y poruhan sa playoffs, nagkanayon nga maapektuhan ang pagpalambo sa kapabilidad sa iyang batan-ong line-up kon dili na sila makabalik og duwa.
“The biggest thing we can benefit from is playing basketball,” matod ni Pierce.
“If the season is going to resume and we are not part of it, it hurts our growth, it hurts our product, it hurts our ability to continue the momentum that we need going to next season.”
Apan wala na’y mahimo si Pierce kon maaprubahan na kini sa board. (AP, ESL)