NAMATAY diha-diha ang usa ka 16-anyos nga lalake human pusila sa wa mailhing mamumuno pasado alas 7 sa Martes sa gabii, Hunyo 2, sa Casia, Bankal, Dakbayan sa Lapu-Lapu.
Ang biktima giilang si Leo Duhig, nagpuyo sa nahisgutang dapit.
Matod ni Police Captain Aibert Jay Samson, hepe sa Pusok Police Station sa Lapu-Lapu City Police Office (LCPO) nga si Duhig, uban ang iyang igsuon, naglabay lang unta og basura duol sa ilang pinuy-anan dihang sa ilang pag-uli, sila gipamusil.
Nakadagan ang igsuon ni Duhig samtang ang biktima nakabsan sa kinabuhi human maigo sa nagkadaiyang bahin sa lawas.
Ang gunman nga nagtaptap sa nawong dali usab misibat luwan sa motorsiklo.
Usa gitan-aw karon nga motibo sa pagpusil mao ang posibilidad nga adunay nasuko kang Duhig.
Nakadawat og taho si Samson nga adunay gikaaway si Duhig sa duwang basketball pipila ka mga semana na ang nakalabay.
Susihon usab sa kapulisan kon duna bay kalambigitan ang pagpamusil sa laing pagpamusil usab sa usa ka kawani sa Lapu-Lapu City Hall niadtong Lunes nga diha ra usab sa Brgy. Bankal.
Ang duha ka pagpamusil pulos nagbilin og posibleng mga kabhang ug basiyo sa gituohang kalibre .45 nga armas de fuego.
"Posible nagdumot gyud niya ang gunman kay nakakuha man ta og 10 ka cartridges sa possible .45 caliber. Amo sad nga susihon apil ang background niining biktima," matod ni Samson.
GIPATAY
Samtang sa laing pagpamusil sa dakbayan pasado alas 5 sa kadlawon, patay usab ang usa manindahay og isda sa Agus Road, Brgy. Agus, Dakbayan sa Lapu-Lapu.
Ang biktima giilang si Edgar Daño Espinosa, kinsa dead on the spot.
Samdan usab ang igsuon niining si Wilmar Daño Espinosa human maigo sa paa.
Wa hinuon maigo ang ig-agaw sa biktimang si Weber John Espinosa Maragrag, nga uban sa magsuon atol sa pagpamusil.
Matod ni Police Sergeant Cliffton Manogura, desk officer sa Marigondon Police Station sa LCPO nga ang tulo luwan sa ilang mga biseklita dala ang ilang mga isda nga gisulod sa balde dihang nibutho ang gunman nga luwan usab og motorsiklo.
Dali silang gipamusil ug dali dayong misibat usab sa dapit ang gunman.
Nagpadayon pa ang imbestigasyon sa kapulisan kon unsay posibleng motibo sa pagpamusil./GCM