NASUDLAN na sa labing unang mga pasyente nga Covid-19 positive apan asymptomatic ang Cebu City Quarantine Center (CCQC) sa North Reclamation Area (NRA) sa Dakbayan sa Sugbo.
Martes, Hunyo 2, gihatod sa ambulansiya sa Cebu City Government ang usa ka hamtong nga babaye paingon sa CCQC nga giubanan sa duha ka paramedics.
Miyerkules, Hunyo 3, dunay laing duha ka mga asymptomatic Covid-19 positive ang gipahiluna sa pasilidad.
Si CCMC hospital administrator Yvonne Cania, kinsa gitugyanan ni Mayor Edgardo Labella sa pagdumala sa CCQC, nagkanayon nga sa miaging semana pa andam ang pasilidad sa pagdawat og pasyente.Ang pagpa-ospital sa CCQC libre para sa mga symptomatic nga adunay mild o moderate nga sintomas nga paga-atimanon sa mga doktor gikan sa CCMC.
Dugang ni Cania nga libre ang kaon sa mga pasyente gikan sa pamahaw, paniudto, panihapon lakip na ang vitamins.
Si City Administrator Floro Casas Jr., nisugo kang Epay Perros sa paghatod og 2,000 ka personal protective equipment ug 10,000 ka surgical mask ngadto sa CCQC nga adunay 166 bed capacity.
Ang pasilidad nga gigastuan sa City Government og kapin P50 milyones ug adunay kahimanan pagpatay sa virus nga mogawas sa pasilidad sama sa negative air pressure para adunay kabutangan sa mga pasyente nga adunay sintomas.
Gawas sa CCQC, ang City Government dunay Barangay Isolation Centers (BIC) nga gibutangan sa mga Covid-19 positive kinsa walay mga sintomas. (PAC)