BUGTONG maabag sa kagamhanan sa Dakbayan sa Lapu-Lapu alang niadtong mga pribadong pasahero nga moabot sa tugpahanan sa Mactan, mao lang ang paggiya kanila sa hotels nga ilang temporaryong ka-istaran, ilabi na niadtong magpaabot sa resulta sa ilang Covid-19 test.
“Sa private individual nga passenger sila ray mopili sa ilang hotel. Ang City maoy mo-provide sa list sa mga hotel and rates kon asa sila gusto magpa-book,” matod ni Mayor Junard Chan.
Giklaro sa mayor nga di ang Siyudad maoy moabaga sa ilang polymerase chain reaction (PCR) test ug hotel accommodation sa maong mga pribadong pasahero.
Sa kadtong adunay medical certificates o nagnegatibo sa resulta sa PCR test mamahimong hakuton sa Siyudad aron ihatod ngadto sa ilang tagsa-tagsa ka mga destinasyon sud sa hurisdiksiyon sa Lapu-Lapu.
Samtang sa kadtong paingon gawas sa Lapu-Lapu, ang hingtungdan nga local government unit (LGU) maoy mangunay og kuha sa maong mga pasahero nga negatibo, apan buot mopauli sa ilang dapit .
“What if ang pasahero nag-positive? Adto ibutang sa isolation facility (taga-Lapu Lapu),” matod pa sa opisyal.
Una nang namahayag si Chan nga ang Overseas Workers Welfare Administration (Owwa) maoy moabaga sa mangabot nga Overseas Filipino Workers (OFW) sa Mactan Cebu International Airport.
Gi-require ang maong mga OFW nga adunay medical certificate nga ikapakita nga negatibo sa virus.
Sa kadtong wa pa makapa-test, ipaubos sila sa PCR sa tugpahanan nga abagahon sa Owwa, lakip na sa ilang hotel accommodation.
Apan moabag gihapon ang Lapu-Lapu City Government sa paghakot aron mahatod sa ilang destinasyon sa dakbayan ang mga nag-negatibo.
Usa sa mga problema nga atubangon sa mga local government unit mao ang pagpanguli sa ilang mga lumolupyo nga OFW.
Ang nasudnong kagamhanan moipapauli na kanila nga way koordinasyon tali sa mga LGU.
Kini human usab nimando ang Malacañang sa pagdawat kanila taliwa sa pagkatanggong sa 20,000 kapin ka mga OFW sa Manila kay nagdumili ang ilang mga LGU sa pagdawat.
Karon nga ang MCIA duna nay pasilidad alang sa tests, ang tanang OFW nga moagi sa airport susihon una kon wa ba silay Covid-19.