USA ka mag-uuma gitigbas ang asawa nga nanghagis tungod sa tumang pangabubho niadtong Martes, Hunyo 2, alas 9:00 sa gabii sa Purok Manga, Barangay Uling, dakbayan sa Naga.
Si Maria Bacus, 56, minyo samdan sa iyang agtang ug suwang.
Ang bana nga suspek sa pagpanigbas mao si Paulino Bacus, 59, mag-uuma, kinsa nadakpan sa kapulisan.
Si Police Staff Raymund Romarez maoy nangulo sa follow-up operation uban sa mga barangay tanod kagahapon, Hunyo 3, sa alas 12:10 sa kaadlawon.
Ang asawa gikataho ng nagselos sa iyang bana kay nagtuong dunay laing babaye nga gikabuangan kini. Sa kalagot sa bana, gitigbas niya og sanggot.
Apan ang suspek nga bana nga nahinabi sa Superbalita Cebu hugtanong nihimakak nga gitigbas niya iyang asawa.
Matod niini, naunay ang iyang asawa dihang gibunalan niya og lock sa kadena sa pultahan dihang nanghasi ngadto kaniya.
“Kaniadto pa kini nga magselos kaniya bisan kinsa nalang babaye ang ipahid nako nga akong kabit,” asoy sa bana.
“Kining gwapo ta, maangkon ko ana, sige siya og selos maghisgot anang ‘Baby’. Daghan siyang giyawit di man tinuod, pero mahal gihapon nako siya may unta pasayluon ko niya,” dugang sa bana.
Gibutyag niini nga mismo iyang lima ka mga anak kahibalo sa pagkaselosa sa ilang inahan.
Kanunay niyang dalhon sa iyang trabaho kaniadto oa didto sa lungsod sa Moalboal, hangtod karon, wa mausab sigehan siya og bantay kay mamabaye.
Nangayo na siya og abag sa ilang mga anak nga ipabadlong ilang inahan kay sobra na kaayo pagpangabubho.
Dugang niini nga kun gitigbas pa niya iyang asawa, dili na kini maka-report sa ilang paryente ug gihulagway niini nga tumotumo ang pasangil batok kaniya.
Samtang, ang chief tanod talandugon ang kahimtang human gidunggab iyang kauban naangol sab atol sa insidente niadtong Martes, Hunyo 2, sa Sitio San Vicente, Barangay Don Pedro, Dakbayan sa Bogo.
Si Domingo Mellor, 57, chief tanod sa Barangay Cayang, Bogo, nakaangkon og duha ka samad dinunggaban samtang, naangol ang kaubang tanod nga si Conchita Versales, 57.
Nadakpan sa kapulisan si Jhudiel Reviral, 29, ulitawo ug taga Barangay Don Pedro, Bogo.
Si Police Master Sgt. Alexis Camelo Villacruct sa Bogo Police Station nga nahinabi sa Superbalita Cebu nagkanayon nga ang mga tanod nagbantay sa utlanan sa Barangay Control Point dihang naabot si Reviral kusog nga nagpadagan sa iyang motorsiklo.
Wa mohunong ug gidasmagan pa ni Reviral ang karatola sa Brgy. Control Point sa utlanan sa ilang lugar.
Tungod niini, ang mga tanod nisakay usab sa ilang motorsiklo ug nahitabo ang ginukdanay.
Dihang hapit na maabot si Reviral sa iyang panimalay kalit nga gibabag ang iyang motorsiklo hinungdan nga ang mga tanod nga nagsugod nalimbuwad sa ilang gisakyang motorsiklo sa kalit niini nga pagpreno.
Wa maglangay si Reviral ug daling midagan paingon sa chief tanod ug iyang gipauwanan og kinumo pero, wa naigo, nibunot siya sa kutsilyo ug gihansakan makaduha ka higayon sa lawas. (GPL)