DUGANG unom ka mga pulis nga sakop sa Cebu City Police Office (CCPO) ang positibo sa Covid-19 nga gipanglain na karon.
Samtang, 17 ka pulis nga positibo sa miaging swab test ang nagnegatibo na sa virus.
Mao kini ang gibutyag ni Police Bigadier General Albert Ignatius Ferro, hepe sa Police Regional Office (PRO) 7, Miyerkules, Hunyo 3.
Apan wala una nganli ni Ferro kung asa kini nadestino nga police stations nga nakuhaan og swab sample sa miaging semana apan ang resulta sa pagsusi sa laboratoryo nigawas kagahapon lang,
Giingong nakuha nila ang virus gikan sa ilang dinakpan ug nabilanggo sa ilang police station nga hinungdan nga wala na pagawsa sa ilang hepe sa police station ug gipanglain dayon sa miaging semana.
Apan gibalhin sila sa isolation facility sa dakbayan alang sa hingpit na monitoring.
Si Ferro nihulagway sa bag-ong kaso sa Covid-19 pulos asymptomatic.
“Naa sila diri sa downtown para atong tiwason ang ilang medical needs. Asymptomatic man tanan, but kagabii, naay nag kalintura (hilanat) but recovering naman siya..” matod ni Ferro.
Dugang ni Ferro, gawas sa 17 ka mga pulis nga nagnegatibo na sa Covid-19, dunay laing 10 ka mga pulis nga nagpaabot sa resulta sa swab test ug gilauman niya na magnegatibo usab kini.
Ang maong mga pulis gipahimutang sa recovery facility sa Barangay Taptap, bukirang dapit sa siyudad sa Sugbo.
Makahimo na ang mga pulis nga nagnegatibo nga makapauli sa ilang balay sa sunod semana sa pagseguro nga hingpit na nga naayo.
“I would like to announce that 17 of them have negative result on their second swab test. So, usa pa ka swab test and they will be considered as fully recovered,” dugang ni Ferro.
Padayon ang monitoring sa Regional Health Service (RHS) sa mga pulis sa Rehiyon 7 nga gihilantan. Apan, matod ni Ferro nga sa pagkakaron, wala pay nasuta nga angayang ipaubos sa swab test. (AYB)