GILIBKAS na ni Mayor Edgardo Labella ang lockdown sa sityo Callejon sa Barangay Labangon ug sityo Upper, Barangay Bacayan atol sa ikatulong adlaw sa general community quarantine (GCQ) sa dakbayan sa Sugbo.
Ang mayor nilagda og duha ka mga memorandum nga gipadala ngadto kang City Administrator Floro Casas Jr., Philippine National Police ug Cebu City Disaster Risk Reduction and Management Office niadtong Hunyo 2 para paglibkas sa lockdown.
Ang Callejon sa Labangon maoy lugar nga grabeng naapektohan sa Covid-19, diin 125 ka mga kaso sa ilang barangay gikan sa maong dapit.
Ang tanang mga pasyente nga asymptomatic nakagawas na sa barangay isolation center (BIC) gumikan sa pagnegatibo na sa resulta sa ilang swab test.
Sa barangay Bacayan, kadtong 41 nga nagpositibo sa Covid, nakagawas na usab sa ilang BIC human nagnegatibo ang ilang swab test.
Sa kasamtangan, ang Alaska na lang sa Barangay Mambaling ang nagpabilin nga lockdwon, apan inanay na usab nga nikunhod ang ilang nataptan sa virus ug padayon nga nisaka ang ilang recovery.
BAG-ONG COVID
Samtang ang City Health Department nakarehistro og dugang 16 ka bag-ong recoveries, Hunyo 3,2020 samtang 42 ka mga bag-ong kaso sa Covid.
Kini nagagikan sa barangay Duljo Datima ( 6); Labangon ( 4); Tejero ( 4); Sambag 1( 3); Basak San Nicolas ( 2); Ermita (2); Inayawan (2); Quiot (2); Sawang Calero (2); Tinago ( 2) ug tag usa gikan sa Banawa, Guadalupe; Luz, Bulacao, Calamba, Camputhaw, Carreta, Guadalupe, Lahug, Lorega, Pardo, San Nicolas Proper, Suba ug Tisa. (PAC)