GITUGOT na ang pag backride sa mga motorsiklo sa lalawigan sa Sugbo, apan kinahanglan una nga mapasar ang usa ka ordinansa.
Kini maoy kamandoan nga giluwatan ni Gobernador Gwendolyn Garcia nga mao ang Executive Order (EO) 19 sa Hunyo 3, 2020 atol sa press conference sa Kapitolyo.
“Gitun-an ni natog maayo. Gitun-an nato ang balaod Republic Act 4136 kabahin sa mga motorsiklo. Gitun-an nato ang Supreme Court decision kabahin sa backriding policy ug sigon sa balaod, nakita nato nga wala gidili ang backride. Busa, ubos niini nga Executive Order No. 19 tugotan nato usa ra mo backride,” matod ni Garcia.
Sa Hunyo 3, nakigtigom si Garcia sa Land Transportation Office (LTO) 7, Land Transportation Franchising and Regulatory Board (LTFRB) 7, kauban ang unom ka mga kadagkoan sa mga component cities ug ang pangu sa League of Municipalities of the Philippines (LMP), Liloan Mayor Christina Garcia-Frasco, aron hisgutan ang backriding.
Ubos sa kamandoan, kinahanglan nga magsul-ob og helmet ug closed shoes, di usab magpabayad tungod kay gitugotan lang pamilya ang makasakay o kauban sa opisina.
“Subay sa balaod ug sigon sa decision sa Korte Suprema nga pinakabag-o, dili mo mo charge. Alang kini sa mga pamilya ug mga nagkinahanglan nga mosakay og motor padulong sa trabaho ug kauban ba sa opisina. So, tugtan na nato usa lang ka backride mag-helmet,” matod ni Garcia.
Apan ang pagpirma sa EO ni Garcia di pa buot pasabot nga epektibo na kini.
Aron nga mahatagan og ngipon, usa ka special session ang ipahigayon sa Hunta Probinsyal alang sa pagpasar sa provincial ordinance sa pag-adopt sa maong kamandoan karong Biyernes, Hunyo 5.
Kon kini ma aprubahan na sa Hunta Probinsyal, mahimo na kining ipatuman lukop lalawigan sa Sugbo.
Si LTO 7 Director Victor Caindec, kinsa nitambong sa tigom, niingon nga iya pang tan-awon ang ordinansa.
“Lisod man i-comment nga wala pa ta kakita sa structure. Bisan pa og naa tay idea kon unsay atong stand. Apan kinahanglan man kita nga maghuwat sa position sa sa DOTr (Department of Transportation) kay ang DOTr man ang nagpatuman ana nga policy,” nagkanayon si Caindec.
Matod niya naa na sa DOTr ang hukom.
“Kon madawat nato puhon ang kopya sa executive order ug sa Provincial ordinance ato ra gihapon nang i-forward sa LTO Central Office unya maghuwat ta og askyon sa LTO unya ilang ipadala sa DOTr unya og unsay aksyon, anha na ta molihok kon unsay ilang i-prescribe nato nga aksyon. Sa pagkakaron, it is what it is,” dugang ni Caindec.