SUPERBALITA CEBU

Way face mask di makasimba

NAANDAN: Ayaw na kahibung nga tiunan ka og thermal gun sa pagsud nimo sa simbahan kay mao na kini ang naandan isip kabahin sa health protocol samtang naghulga pa ang coronavirus disease (Covid-19). (Amper Campaña)

WAY face mask, di makatambong sa misa.

Mao kini ang usa lang sa mga health protocol nga gisugdan na pagpatuman sa Archdiocese of Cebu karon nga gitugtan na ang mga simbahan sa pagpahigayon og misa.

Hunyo 2, 2020, si Gobernador Gwendolyn Garcia niluwat sa Executive Order (EO) 17-F nga nagtugot na sa mga Sugboanon sa Lalawigan sa Sugbo sa pagtambong sa mga misa, apan 50 porsyento lang sa kapasidad ang tugtan matag misa.

Si Fr. Japeth Geonzon, vice chairman sa Commission on Worship sa Archdiocese of Cebu, niingon nga way bisan usa nga tugtang makasimba kon di magsul-ob og mask.

Si Geonzon niingon nga usa lang kini sa mga health protocol nga gisugdan pagpatuman sa Archdiocese sugod sa Hunyo 1, 2020 nga maoy pagsugod sa general community quarantine (GCQ) sa Dakbayan sa Sugbo.

“We need to wear our face mask at all times,” matod Geonzon.

Matod ni Geonzon nga ang health protocol gipatuman sa tanang mga simbahang Katoliko sa Sugbo agi og pagtuman sa mga regulasyon sa kagamhanan.

“Gi-require sa atong talahurong Obispo (Jose Palma) nga mo-comply ta sa health protocol covered and mandated by our government,” pasabot ni Geonzon sa interbyu sa GMA 7 Balitang Bisdak.

MGA LAKANG

Gawas sa mask, ang mga simbahan gimandoan usab sa pagbutang og foot bath, sanitation area ug alcohol.

Ila usab nga giseguro nga mapatuman ang one-meter distance pinaagi sa pagbutang og mga marker sa mga bangko.

Gimandoan usab ang mga simbahan sa pagpalit og thermal scanner/gun aron ang matag manimbahay nga mosulod, kuhaan og temperatura sa di pa tugtang motambong sa misa o mag-ampo.

Sa panahon sa kalawat, ang pari kausa lang mosulti og “kalawat sa lawas ni Kristo” ug motubag ang tanan og “Amen.” Kini aron mas paspas ang paghuman sa misa.

Ang mangalawat di na sab magpataka og exit igkahuman kay anha sila paagion sa matag kilid aron di magkasugat sa ubang mga manimbahay.

Aron matuman kini, duna silay gipamutang nga karatula sa mga simbahan aron magpahinumdom sa tanang mga magtutuo.

Matag wali usab gitinguha nga molanat og singko minutos nga maoy labing taas.

DISINFECT

Ila usab nga gihangyo ang mga magtutuo nga patas-an ang pasensya kay matag misa, mogintang na og tag usa ka oras aron dunay higayon sa pag-disinfect.

Mao nga tag usa na ka oras ang gintang sa mga misa kay 30 minutos niini gigahin alang sa pag-disinfect sa matag bangko.

Aron usab matuman ang tanang health protocol sa kagamhanan nga gisunod sa simbahan, matag parokya nagtukod na og sanitation and health ministry.

Giklaro ni Geonzon nga bisan ang pagbukas nila sa Cebu Metropolitan Cathedral ilang gisanghid sa Barangay Santo Niño. Ang barangay na ang nipahibawo sa buhatan ni Cebu City Mayor Edgardo Labella nga giingong nisanong gilayon sa hangyo.

Bisan kon way executive order (EO) alang sa pagtugot sa relihiyusong panagpundok sama sa misa, ang mga simbahan nangbukas sukad gipailawom ang siyudad sa GCQ.

Ang tanan usab nga protocol nahasubay sa mando sa Catholic Bishops Conference of the Philippines (CBCP).

MAKATAMBONG NA

Sugod karong Dominggo, Hunyo 7, 2020, mahimo na nga makasimba ang mga Sugboanon sa Lalawigan sa Sugbo.

Kini maoy nalatid sa Executive Order (EO) 17-F nga giluwatan ni Gobernador Gwendolyn Garcia sa Hunyo 2, 2020.

Kini human nga mipahibawo si Cebu Archbishop Jose Palma nga andam na ang mga simbahan sa pagpahigayon og mga misa pinasubay sa health protocol ubos sa GCQ.

Si Garcia na mismo ang niawhag sa katawhan sa pasimba.

“We are strongly encouraging the holding of religious gathering. As much as we need our physical and mental health, we also need our spiritual health,” matod ni Garcia.

Ubos sa kamandoan, kinahanglan nga 50 porsyento lang nga capacity sa simbahan ang makatambong sa misa.

Kinahanglan usab nga mosubay gihapon sa health protocol sama sa pagmintinar og social distancing, pag-disinfect sa kaugalingon, pagsul-ob og mask ug uban pa.

Sukad nga gipaubos sa community quarantine ang lalawigan, wa na gitugot ang mass gatherings, nga naglakip sa misa, piyesta ug uban pang selebrasyon diin magtapok ang mga tawo taliwa sa hulga sa Covid-19.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph