PADAYON nga giatiman sa mga doktor ang usa ka mayor lakip na ang asawa ug drayber niini human gi-ambush sa wala pa mailhing mga tawo sa Zone 2, Barangay Iponan, dakbayan sa Cagayan de Oro mga alas 9:20 sa buntag, Hunyo 3.
Samaran sila si Lumbaca Unayan, Lanao del Sur Mayor Somerado Gur, 60, lakip ang asawa niini nga si Rohaifa Gur, 26.
Samtang samdan usab ang drayber nga si Ibrahim Gani, 58, minyo ug drayber sa mayor. Suwerteng wala naigo ang laing kauban nga si Abdul Rafi Guro, 19, ulitawo ug staff usab sa mayor.
Gibutyag ni Police Major Evan Viñas, tigpamaba sa Cagayan de Oro City Police Office (Cocpo), nga padayon pa ang imbestigasiyon aron masuta ang motibo sa pagpamanhig.
“As of now, they are conducting investigation pertaining to the motive of the incident,” matud ni Viñas.
Subay usab sa nakasaksi sa maong insidente, kalit lang nga gipusil sa wala mailhing mga suspetsado nga nakamotorsiklo ang pick-up nga gisakyan sa mga biktima nga nagdala sa numero sa plaka nga KAD 4895, nga napuno usab sa mga bangag agi sa bala sa armas.
Sa saysay sa pag-umangkon nga gikan sila sa Bloomingdale pagawas na sa siyudad aron mobalik sa Lanao del Sur. Pag-abot sa maong dapit, kalit nga gipusil sa duha ka mga suspetsado nga sakay sa motorsiklo ang ilang gisakyan nga pick-up.
Suwerte usab nga human sa maong pagpamusil nakamaniobra pa ang mga biktima paingon sa Polymedic Plaza Hospital nga nahimutang sa Kauswagan ning siyudad, kinsa padayon nga giatiman sa mga mananambal.
Gikondena usab ni Mayor Oscar Moreno ang maong nahitabong pagpamanhig ug naglaom ilabi na ngadto sa kapulisan nga maaresto ang mga suspetsado ug mabilanggo.
Padayon ang imbestigasiyon sa kapulisan ug hot pursuit operation aron sa dinaliang pagkasikop sa mga suspetsado.