Nagplano na ang Omega Pro-Sports International (Opsi) nga mopahigayon pagbalik og boxing promotion karong Hulyo o Agusto 2020 sa dakbayan sa Sugbo.
Mao kini ang gibutyag ni Opsi vice president Jerome Calatrava sa pagpakighinabi ning mantalaan kagahapon.
“Hinayhinay na mang gi-allow ang contact sports, so we are planning to hold a promotion this July or August para activity sa atong boxers sa Omega,” matod ni Calatrava.
Sulod na sab sa kapin sa duha ka mga buwan nga nahunong ang kalibutan sa paugnat sa kusog tungod sa pagkuyanap sa makalilisang nga coronavirus disease 2019 (Covid-19).
Giklaro ni Calatrava nga naghuwat pa sila nga maaprubahan sa Games and Amusement Board (GAB) ang ilang plano.
Gipasabot ni Calatrava nga sa ilang pagbalik, ilahang tumanon ang tanang mga lagda nga ihan-ay sa GAB.
“Atong tumanon tanang protocols sa GAB. Naa sab ta’y atong kaugalingong protocols para maseguro nato ang safety sa tanang involved,” pasabot ni Calatrava.
“For sure, closed-door gyud una ta. Mangita pa ta’g venue nga atong mga-closed door.” Matod ni Calatrava nga sa dili pa sila mopadala og suwat sa GAB kabahin sa ilang plano, ilaha unang ihan-ay ang tanang mga parisan sa promosyon.
“Mao ni pinaka-challenging, ang match making tungod sa travel restrictions,” matod ni Calatrava.
“Ang atoa kuhaon nga kontra para sa atong boxers kay kining naa ra gihapon sa Cebu. Challenging kaayo ni kay kinahanglang nindot gihapon ang pairings.”
Nanghinaot si Calatrava nga adunay mga boksidor nga andam makaparang sa ilang mga boksidor alang sa plano nilang pagbuhi’g balik og promosyon.
Kabahin sa ilahang mga boksidor, gipasabot ni Calatrava nga nagpadayon ra gihapon ang ilang training taliwala sa quarantine period.
“Atoa man gud ni sila nga gihouse sa Omega gym. Naay support sa tanan nilang kinahanglanon,” pasabot ni Calatrava. “So while nag-quarantine, padayon gihapon ang ilang training sa atong gym.” / ESL