Giaprobahan sa PBA Board of Governors niadtong Miyerkules ang pagbalhin sa prankisa sa Columbian Dyip gikan sa Columbian Autocar Corporation ngadto na sa sister company niini nga mao ang Terrafirma Realty Development Corporation.
Ang vice-governor sa PBA nga si Bobby Rosales, kinsa mao usab ang Columbian governor, mikompirmar ning kalambuan atol sa kinalit nga press conference human sa board meeting nga gipahigayon sa PBA office sa Libis, Quezon City.
“This afternoon, I submitted a letter request to the board on behalf of the Columbian Autocar Corporation which owns the PBA franchise. The request is to transfer the franchise to the sister company ... Terrafirma Realty Development Corporation. Both companies are owned and controlled by [Palawan] governor Jose Alvarez,” matod ni Rosales.
Matod ni Rosales nga ang Terrafirma maoy tag-iya sa assembly plant sa tanang sakyanan sa Columbian group of companies ni Alvarez ug ubang mga brand sama sa Peugeot.
Si Ricky Vargas, ang chairman sa board, nagkanayon nga gamay na lang dokumento ang gikinahanglan sa Columbian aron pormal na nga mabalhin ang pagpanag-iya niini.
Nagtuo si Rosales nga posibling magpabilin gihapon ang moniker niini nga Dyip apan dili na magdala sa pangalan nga Columbian.
“Most probably, we will be retaining the name of the Dyip but of course, we can change that. Wala lang Columbian. It might by Terrafirma Dyip,” ni Rosales pa.
Wa pa matino kon ang pagbalhin sa pagpanag-iya niini makaapekto ba sa operation sa team.
Nisulod ang Columbian Group of Companies niadtong tuig 2014 uban sa Blackwater isip expansion teams sa PBA.
Si Filipino boxing icon Manny Pacquiao maoy nagsilbing playing-coach sa ilang unang tuig sa bugtong professional basketball league sa nasod.
Sa ilang unang season, ang maong franchise ginganlan og KIA Sorento. Apan kadaghan na kini mag-ilis og pangalan diin nahimong KIA Carnival, Mahindra Enforce, Mahindra Foodbluster, ug KIA Picanto hangtod nga nahimo kining Columbian Dyip sukad niadtong 2018.
Sulod sa lima ka tuig, kausa ra gyud sila makataak sa playoffs. Sa niaging season, si CJ Perez, kinsa maoy franchise player sa team, maoy nahimong Rookie of the Year. / JBM