Gipresentar sa National Basketball Association (NBA) ang bag-ong format nga ilang gamiton sa paghibalik na unya sa mga duwa sa sunod buwan.
Ubos sa maong plano, sa 30 ka mga teams, 22 na lang ang makabalik og duwa aron pagdeterminar sa mga mosulod sa playoffs sa matag conference.
Kini maoy nakab-ot nga kalambuan atol sa panagtigom sa board of governors. Matod pa nga ang nahabiling walo ka mga teams wala nay purohan nga makasulod sa playoffs, hinungdan nga dili na sila paduwaon.
Ang tanang duwa adto na ipahigayon sa ESPN Wide World og Sports complex sa Disney campus sa Orlando. Sugdan kini sa Hulyo 31.
Kon hingpit nang maaprobahan, kini maglangkob na unya sa 13 ka mga teams sa Western Conference samtang siyam ang sa Eastern Conference.
Ang playoffs magsugod sa Agusto ug ang Finals ari na sa Oktubre.
Nakasiguro na sa playoffs ang Milwaukee Bucks, Los Angeles Lakers, Toronto Raptors ug Boston Celtics, sa ato pa ang laing walo nga nagsunod padayon pang manikaysikay aron pormal nga makahulbot og luna ug madeterminar ang ilang puwesto.
Kini mao ang Miami Heat, Indiana Pacers, Philadelphia 76ers, Los Angeles Clippers, Denver Nuggets, Utah Jazz, Oklahoma City Thunder ug Houston Rockets.
Ang Dallas Mavericks posibling makasiguro sa playoffs sa West sanglit nag-una man kini og pito ka daog batok sa Memphis Grizzlies.
Niini, ang magtigi alang sa katapusan ug ikawalo mao ang Grizzlies, Portland, New Orleans, Sacramento, San Antonio ug Phoenix.
Sa East, ang Washington nabiyaan og unom ka daog sa no. 7 nga Brooklyn Netts ug nabiyaan sab sila og lima ka daog sa Orlando nga maoy ikawalo.
So naa pa man tuod silay purohan pero tungason na sab kaayo.
Si Gov. Ron DeSantis sa Florida, atol sa press conference, mihangop ning maong kalamboan.
“I’m all in from the state’s perspective. I don’t think you could find a better place than Orlando to do this. I think it’s very exciting,” matod sa gobernador. / JBM