Kinasingkasing ug hugot ang pagpasalamat ni kanhi world boxing challenger Z Gorres ngadto sa tanang miitsa og hinabang kaniya taliwala ning nagpadayong krisis sa panglawas dala sa coronavirus disease (Covid-19).
Nagsugod pagdagsa ang mga hinabang pila lang ka adlaw human napublikar sa Superbalita Cebu ang kalisdanan, uban sa iyang amahan, nga ilang nasinati ning krisis nga nakapaundang sa ilang pagpaninda og sud-an nga maoy ilang gihimong kapanginabuhian.
“Sir thank u kaayo sa tabang nmo sir ug sa Superbalita ha. Daghan intawon ko og nadawat mga pagkaon, Sir Daghan gyud kaayong salamat,” matod ni Gorres sa online interview.
Gawas sa pipila ka mga kauban ug kahigalaan sa kalibutan sa boxing, midagsa usab ang mga kanhi niyang dumadapig nga wala mag-usik og higayon nga makabisita ug midunol kaniya og hinabang.
Ang local government unit (LGU) sa Liloan diin si Gorres nagpuyo karon, grupo sa mga kapulisan ug mga batan-on ang misanong usab sa iyang panginahanglan.
Hangtod karon aduna pa gihapoy misaad nga mobisita kaniya.
“Wala gyud ko mag-expect nga ingon ani diay ilang tabang nako. Happy kaayo ko,” dugang ni Gorres o Butchoy ang tawag kaniya sa iyang mga kahigalaan.
Kini naglakip sa mga kanhi niya stablemates sa Ala Boxing Gym nga gipangulohan nila ni kanhi world champion ug boxing legend Donnie “Ahas” Nietes, Rey Caitom, Michael Dominggo. Miitsa usab sa suporta sila si kanhi world champions Malcom Tunacao nga atoa na karon magbasehan sa Japan, ug Rodel Mayol nga atoa sa US ug kanhi world challenger Bert Batawang.
Sa Sabado, Hunyo 6, gikatakda usab nga moduaw kaniya ang grupo sa mga Paclanders diin sakop usab si boxing judge Arnie Najera ug Balamban barangay councilor Junjun Dalogdog.
“Nitawag sab si coach Edito (Villamor) nako gabii. Basin moari to sila mga Ala Boys. Ingon pud Rodel (Mayol) nga moari ang Paclanders sa Sabado,” ni Gorres pa.
Ubang gipanghinganlan ni Gorres mao sila si Barangay Captain Romulo Echavez Tingi sa Ibabao-Estancia, Mandaue City, Delfina Geldor Quejada, El-el Fabillar, Philip Fabillar, Dhen Mark Canceran, Roque Gatdula, Jan Gabriel Melgo, Jimbo Teves, Vicente Medina ug Glenn Mangalanit.
Ang Superbalita Cebu nakadawat usab og mga tawag nga nagpakisusi usab sa address ni Gorres.
Sa miaging semana, sa Facebook Page sa Superbalita Cebu, ang balita nga nag-ulohan og “Covid-19 Panid sa Pagsuway ni Gorres” nga naghubit sa iyang kahimtang ning krisis mitali og 103,767 ka engagements ug 610 ka shares.
Dinhi gisaysay ang mga pag-antos ni Gorres human sa iyang pagkaparalisa sa dihang niaway siya didto sa Amerika niadtong 2019.
Nagkabuwag siya sa iyang asawa ug anaa na siya karon nanimuyo sa Yati, Liloan uban sa iyang amahan. / JBM