MOABOT na sa 15 ka mga indibidwal ang close contact sa 41-anyos nga lalaki nga nagpositibo sa coronavirus disease 2019 (Covid-19) sa Caraga Region kinsa nakatambay sa Cagayan de Oro sulod sa pila ka bulan.
Kini nga confirmed Covid-19 patient residente sa Agusan del Sur ug naabot sa Dakbayan sa Cagayan de Oro niadtong Pebrero 24, 2020 gikan sa Manila ug nagpuyo sa Zone-12, Bulua.
Gibutyag ni Dr. Lorraine Nery, officer-in-charge sa Cagayan de Oro City Health Office (CHO), nga anaa na sa 15 ka mga indibidwal ang ihap nga close contact niini sa Hunyo 4, 2020 human nasuta ang mga kalihukan niini sa dakbayan sa wala pa makabiyahe paingon sa Caraga Region.
Kini nga mga kalihukan sa maong pasyente diin niadtong Mayo 1,2020 nakita nga nagtari-tari kini kauban ang mga silingan; Mayo 17, 2020 nagtong-its kauban ang mga silingan; Mayo 18, 2020 nagpakonsulta sa usa sa mga ospital sa Cagayan de Oro; Mayo 19, 2020 niadto sa barangay hall sa Bulua; Mayo 21, 2020, nakakuha og travel pass sa Provincial Health Office (PHO) sa Misamis Oriental ug nibiyahe paingon sa Caraga ug Mayo 26, 2020 na-swab ug nagpositibo sa virus.
"We have identified fifteen contacts of that person. Ang fifteen nga contacts ani mostly of course as reported kay nagkuan man siya sa iyahang mga neighbors so they are mostly from Bulua, some are from Iponan and some are from other areas in Cagayan de Oro City," matud ni Nery.
Ang duha usab ka close contacts niini nga tag-iya sa balay kung asa kini nagpuyo ang ipaubos sa rapid diagnostic test ug swab test.
Gibutyag usab ni Mayor Oscar Moreno nga kung ihapon ang 14 ka mga adlaw mas balantayunon lang ang kalihukan niini sugod sa Mayo 21 diha sa pag-adto sa Kapitolyo nga makasulod pa sa katorse ka mga adlaw.
Padayon pa karon ang gihimong contact tracing kalabot na niini.