Daghan nang mga residente sa syudad sa Sugbo ang namalik sa ilang mga trabaho niadtong Hunyo 1 kay nibukas na ang ilang mga trabahoan ubos sa general community quarantine (GCQ). Apan naglisod sila sa pagpangitag kasakyan kay way mga jeepney ug kuwang ang buses nga nibiyahe. Ang uban nanglakaw na lang.
Hain man diay ang mga jeepney? Wa padagana ang mga jeepney sukad sa pagpatuman sa kurintinas tungod sa Covid-19 mga duha ka buwan na ang milabay. Bisan GCQ na, wa gihapon pabiyahea ang mga jeepney.
Tungod sa kakuwang sa mga sakyanan, misuwat si Cebu City Mayor Edgardo Labella kang Department of Transportation (DOTr) Secretary Arthur Tugade nga tugotan na ang mga jeepneys nga mobalik sa karsada. Wa pay tubag ang DOTr ning atong pagsuwat.
Kon makabalik sa karsada ang mga jeepneys, ang “king of the road,” maalibyohan ang kakuwang sa mga sakyanan sa mga sumasakay, ilabi na sa mga nanagtrabaho, bisan pa kon katunga ra sa kapasidad ang pasahero tungod sa social distancing.
Mahibalik na sab ang panginabuhi sa liboan ka mga jeepney drivers nga duha ka buwan na nga nakulban sa kaldero tungod sa Covid-19. Maayo na lang kay ang kagamhanan sa syudad sa Sugbo nanghatag nag tagsa ka sakong bugas sa mga drivers nga nagpuyo dinhi.
Apan motugot kaha ang DOTr nga mobalik ang operasyon sa mga jeepneys nga ubos sa ilang target nga gitakda niadtong 2017 pa, kompletuhon man nila ang phaseout sa mga jeepneys karong tuiga ubos sa transportation modernization program?
Si Alberto Suansing, usa ka senior consultant sa DOTr, niingon nga angay nga dawaton sa mga jeepney operators ug drivers ang kamatuoran nga inihap na lang ang mga adlaw sa mga jeepney.
Samtang si Presidential Spokesman Harry Roque niingon nga wa pa mahisguti ang pagbalik sa mga jeepneys tungod kay imposible ang social distancing sa mga jeepney diin ang mga pasahero mag-atubangay.
Unsa man diay ang kapuslanan sa mga face masks? Matod pas taga Cabadiangan, kon gusto gani, daghang mga paagi. Kon di gusto, daghang hinungdan. Ang Covid-19 hayan maoy hinungdan nga makapaundang sa mga jeepney. Apan unsay atong sakyan?