Anaa sa atong Batakang Balaod ang separation sa estado ug simbahan. Ning panahon sa krisis sa panglawas, kinsa ba ang masunod? Ang gobiyerno o ang simbahan? Mihangyo ang kadagkuan sa Simbahang Katoliko sa Inter-Agency Task Force for the Management of Emerging Infectious Diseases (IATF) nga ibalik na ang mga misa. Misaad ang kaparian nga mo-observe sila og social distancing. Hatagan og espasyo nga tag-usa ka metros ang matag manimba.
Ang IATF okey man nga magmisa apan 10 lamang ka mga tawo ang tugutan nga makatambong. Ubos kini sa guidelines sa mga lugar nga gipaubos sa general community quarantine (GCQ). Maoy hinungdan nga daghang kaparian ang nahisagmuyo sa IATF. Apan si Gov. Gwendolyn Garcia uyon nga magmisa apan 50 per cent sa kapasidad sa simbahan ang pasudlon. Magmisa na ang mga parokya karong Dominggo sa lalawigan.
Apan nganong mamugos man ang simbahan? Karon nga nag-atubang ang nasud sa hulga sa coronavirus, ang kagamhanan maoy nasayod sa mga lakang nga angay sundon. Ang gobyerno, di ang simbahan, maoy masunod. Anaa sa gahum sa kagamhanan ang pagdesider aron ka-protektahan ang katawhan. Di angay nga mabalaka ang Simbahan nga malayo ang katawhan sa Ginuo kay temporaryo lang kini.
Kon kaniadto ang atong gipilian mao ang panglawas ug ekonomiya, karon ato nang dugangan sa kaluwasan sa kalag. Hain man niini ang labing mahinungdanon?
Nasayod kita nga managsama silang tanan nga mahinungdanon sa atong pagpakabuhi. Apan taliwala niining kainit karon sa pagbuntog sa misteryusong kagaw, ang pagdugang og makalibog nga mga isyo nakapasamot sa atong problema.
Ang pagpangita ug madaginot nga mga suliran mao ang labing katapusan nato nga gikinahanglan ning panahona. Kon nasugdan na nato ug napamatud- an nga dunay gamay’ng kalampusan ang atong mga pasiunang lakang sa pagbuntog sa kaaway, ato bang pasobrahan ang atong kompiyansa pinaagi sa pagtugot sa tanang pangayoon sa nagka-lainlaing sektor sama sa simbahan? Ang atong gihimo karon maoy inanay nga pagpabalik sa naandan. Lisod ba ning sabton? (bobbygnalzaro@gmail.com)