SUPERBALITA CAGAYAN DE ORO

Asawa sa mayor gi-ambush, patay

NAKABSAN sa kinabuhi ang asawa sa mayor nga gi-ambush sa wala pa mailhing mga suspetsado alas 9:20 sa buntag niadtong Hunyo 3, 2020 sa Zone 2, Barangay Iponan, dakbayan sa Cagayan de Oro.

Ang namatay giila nga si Rohaifa Guro, 26, asawa sa mayor sa Lumbaca Unayan, Lanao del Sur nga si Somerado Guro, 60-anyos kinsa samaran usab atol sa pagpamanhig.

Ang drayber nga si Ibrahim Gani, 58, minyo ug drayber sa mayor ang samdan usab samtang luwas ang laing kauban nga si Abdul Rafi Guro, 19, ulitawo ug staff usab sa mayor.

Gibutyag ni Police Major Evan Viñas, tigpamaba sa Cagayan de Oro City Police Office (Cocpo), nga usa sa mga gitutokan nga motibo mao ang politika, rido ug personal nga kasungian.

“Gi-ablihan karon ang tanang anggulo apil na ana ang giingon nga rido, ug ang politically motivated nga motive ug ang business ug ang other nga motives nga pwedi nato ma incorporate sa mao nga insidente,” matud ni Viñas.

Gidugang pa niini nga base sa nakasaksi ang motorsiklo nga gisakyan sa mga suspetsado Honda wave nga kolor itom ug blue nga nagdala sa numero sa plaka nga KJ24011 apan padayon pa kini karong gipalawman.

Samtang ang mga suspek naka-jacket og dirty white ug dunay helmet usab nga orange ang kolor.

Kahinumdoman subay usab sa nakasaksi sa maong insidente, kalit lang nga gipusil sa wala mailhing mga suspetsado nga nakamotorsiklo ang pick-up nga gisakyan sa mga biktima nga nagdala sa numero sa plaka nga KAD 4895 nga napuno usab sa mga igo sa bala sa armas.

Giingong gikan kini sila sa Bloomingdale pagawas na sa siyudad aron mobalik sa Lanao del Sur apan pag-abot sa maong dapit, kalit nga gipusil sa duha ka mga suspetsado nga sakay sa motorsiklo ang ilang gisakyan nga pick-up.

Dali nga gi-atiman ang mga biktima nga magtiayon labi na ang asawa sa mayor kinsa wala'y swerteng pipila ka mga oras nakabsan gyud sa kinabuhi.

Sa pagsulat niini nga balita nagpadayon pa ang kapulisan aron sa dinaliang pagsulbad niini nga krimen.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph