Gilantaw ni Cebu Governor Gwendolyn Garcia ang pag-rebrand sa katuyoan sa turismo sa Lalawigan sa Sugbo.
Ilusad unya sa kagamhanan isip health and wellness destination ang Lalawigan gikan sa puro lang lingawlingaw kon mahimo na unya nga mobukas sa mga kalihukan sa turismo.
Nalakip na dinhi ang health regimen nga gitudlo sa kagamhanan nga giingong makatabang sa pagsagang sa kagaw sa coronavirus disease (Covid19).
Kini sama sa pagtuob, paginom og lemonsito juice ug turmeric ingon man pagehersisyo.
“I think what should be more deeply imbibed will be our health regimen. In fact, we will now call it, our health and wellness regimen, which I believe is the best way to fight this Covid-19,” matod ni Garcia.
Apan hangtod karon, nagpabilin gihapon sa general community quarantine (GCQ) ang lalaiwgan sa Sugbo.
Ubos sa guidelines, di pa tugotan ang pagbukas sa leisure activities.
Matod ni Garcia nga dako kini og kadaot sa panginabuhian ug income sa mga Sugboanon nga maoy epekto sa Covid19.
Tungod niini, si Garcia nakigtagbo sa kadagkoan sa mga lungsod nga may dagsaon nga tourism activities aron hisgutan ang mga lagda nga ipatuman kon tugotan na nga mobukas ang mga resort, restaurant ug beaches.
“You know, ang worst hit gyud karon ang tourism industry. Unya kita nga Cebu nga economic driver baya gyud ning tourism industry sa tibuok island sa Cebu,” matod ni Garcia.
“But definitely, we will move for the resumption of these tourism activities in order to provide income again to the so many Cebuanos that are now suffering who have lost their jobs, lost their regular income that they used to earn,” dugang ni Garcia.
Moluwat unya si Garcia sa mga protocol nga angay subayon sa tagsatagsa ka mga lungsod nga may nagkadaiyang tourism activities sama sa whaleshark watching, hiking, canyoneering, island hopping ug uban pa.
Hinuon, ang pagbukas na unya sa mga tourism activities di buot pasabot nga maglaaglaag na ang mga tawo, apan katuyoan na niini mao ang pagtabang nga mahimong lagsik ang panlawas. / ANV