Napulo lang ka tawo ang mamahimong makasimba matag misa sa Dakbayan sa Mandaue karon nga nagsugod na kini sa pag-abli ngadto sa publiko.
Lahi kini sa Lalawigan sa Sugbo diin si Gobernador Gwendolyn Garcia nitugot nga 50 porsyento sa kapasidad sa matag simbahan ang makatambong sa matag misa.
Si Atty. John Eddu Ibañez, ang executive secretary ni Mandaue City Mayor Jonas Cortes, niingon gitugot na ang pagpahigayon og misa o mga relihiyusong mga kalihokan sa mga simbahan.
Kini base sa kamanduan sa Inter-Agency Task Force for the Management of Emerging Infectious Diseases (IATFMEID) ug matod sab sa Executive Order (EO) 77 ni Cortes.
Dugang ni Ibañez nga ang mga relihiyosong grupo o simbahan giawhag nga kutob lang sa napulo ka mga tawo ang makasulod sa simbahan o ang makaapil sa mga relihiyosong kalihukan.
Di na kinahanglan pa nga ipadayon ang pagpahigayon sa online nga misa ug mamahimo nang ablihan ang purtahan sa mga simbahan alang sa publiko.
Matod ni Ibañez nga adunay pipila ka mga parokya sa Mandaue City nga nagsugod na sa pag-abli sa ilang mga pultahan alang sa pagsaulog sa misa.
Ang mga parokya aduna nay schedule sa mga misa ug di susama kaniadto nga matag oras.
Kon buot na sa parokya nga mag-abli na alang sa publiko, sigon ni Ibañez, kinahanglan gihapon ang pagtuman sa mga basic health protocol sama sa pagsul-ob og mask ug pag-obserbar sa social distancing.
Sa Lalawigan sa Sugbo, si Garcia nitugot nga 50 porsyento matag simbahan ang makasimba matag misa base sa iyang kapasidad. Magsugod kini karong Dominggo, Hunyo 7, 2020.
BUKAS NA
Ang San Roque Parish sa Barangay Subangdaku, Mandaue City nagpahibalo sa ilang Facebook page nga mobalik na sila sa pag-abli sa ilang parokya ug paghupot og misa.
Nagsugod sila sa unang adlaw sa GCQ, Hunyo 1.
Gitino nila ang pagdili sa pagpatambong og misa sa simbahan ang mga nag-edad og 60 anyos pataas ingon man 21 anyos paubos.
Giawhag lang kini nga motambong pinaagi sa live stream.
Gipatuman sab sa simbahan ang pagsul-ob og mask alang sa tanang manambong sa santos nga misa.
Ang ubang mga parokya ug simbahan sa Mandaue City sama sa The National Shrine of St. Joseph sa Barangay Centro, Holy Family Parish sa Barangay Maguikay ug ang Catholic Church of Christ of the Agony-Gethsemane Parish sa Barangay Casuntingan gipili gihapon nga ipahigayon ang misa pinaagi sa online.
CEBU CITY MOHANGYO
Samtang si Cebu City Mayor Edgardo Labella niingon nga sila si Cebu Archbishop Jose Palma ug Msgr. Roberto Alesna mohangyo sa Department of Interior and Local Government (DILG) ug Regional Inter-Agency Task Force for the Management of Emerging Infectious Diseases nga hinayhinayon ang pagtugot sa pagpahigayon og mga misa.
Matod ni Labella nga ang siyudad dunay dagkong mga simbahan nga makapasud og igo-igong gidaghanon sa mga tawo samtang mag-obserbar sa mga protocol sa panglawas.
“Two days ago, I had a meeting with Msgr. Alesna and Archbishop Palma to make representations sa IATF and DILG, make known to them that Cebu City is a very religious city,” nagkanayon si Labella. / dugang taho ni JJL