PITO ka mga kongresista sa Lalawigan sa Sugbo nagkahiusa pagsuporta sa executive order ni Gobernador Gwendolyn Garcia ug sa umaabot nga ordinansa sa Cebu Provincial Board nga magtugot sa backride sa pribadong motorsiklo alang sa mga sakop sa pamilya.
Ang hiniusang suporta sa mga kongresista gikan sa pito ka mga distrito naatol usab sa hulga sa usa ka opisyal sa Department of the Interior and Local Government (DILG) nga suspensuhon si Garcia tungod sa pagluwat sa Executive Order 19 niadtong Hunyo 3 nga nagtugot sa backriding sa motorsiklo.
Giingong nahasupak kini sa mga polisiya nga gilatid sa Inter-Agency Task Force for the Management of Emerging Infectious Diseases (IATF-MEID).
Ang manifesto sa suporta naghulagway sa polisiya nga “anti poor” kay ang mga kabus ang gihikawan sa bugtong nilang gisaligan nga masakyan panahong ning pandemic.
Ang pito ka mga kongresista naglangkob kanila ni Eduardo Gullas Sr. (1st district); Wilfredo Caminero (2nd district); Pablo John Garcia (3rd district); Janice Salimbangon (4th district); Vincent Franco Frasco (5th district); Emmarie Dizon (6th district); ug Peter John Calderon (7th district).
Matod sa mga kongresista nga ubos na tuod sa general community quarantine (GCQ) ang Sugbo, apan ang kinabag-an sa katawhan nga nanginahanglan sa pampublikong transportasyon wa maserbisyuhi.
Karon untang panahuna, ang motorsiklo gamit kaayo alang sa paghatod ug pagkuha sa trabahoan sa ilang mga sakop sa pamilya.
Apan sa ilang “wa masabting rason,” gidili na hinuon sa Land Transportation Office (LTO) ang paggamit sa motorsiklo.
“This is flagrant violation of Republic Act No. 4136, which does not prohibit the use of motorcycles to transport passengers provided the passenger is related within the fourth degree of civil consanguinity or affinity,” matod sa manifesto.
Matod sa mga kongresista nga isip mga representante sa ilang mga konstituente, di sila makaako nga magpakabuta ug bungol sa ilang mga yangungo ug pangindahay nga libkason kining polisiya nga nagdaugdaug sa mga kabus.
Alang kanila, ang polisiya sa ahensya, ingon sa nag-usab na sa balaud nga di mahimo sa usa lang ka buhatan sa kagamhanan.
“As lawmakers we feel that an administrative agency’s rule that prohibits what the law allows is tantamount to amending the law,” matod nila.
Niini, ilang giawhag ang mga local ug rehiyonal nga mga ahensya sa transportasyon sa pagpakigtambayayong sa Probinsya sa Sugbo sa pagpatuman sa ordinansa.
“Listen to your people, and follow the law,” dugang sa manifesto.
Ang manifesto nga giluwatan naatol taliwa sa hulga ni DILG Undersecretary Epimaco Densing III nga hayan mag-atubang og daghang mga kaso ang gobernador kon iyang ipatuman ang executive order nga nagtugot sa mga tigmotorsiklo sa Probinsya nga makapasakay og backride.
Matod ni Densing nga ang executive order ni Garcia kalapasan sa guidelines nga gilatid sa IATF.
"If she does and that actually will happen in Cebu, I have no choice but to send her a show cause order because this is a violation of a IATF guideline and under the Bayanihan Act RA 11469, all local executive orders and ordinances should be aligned with the policies set down by the national government or the IATF. Otherwise, they can be held criminally and administratively liable," matod ni Densing sa Facebook Live sa Office of the Presidential Assistant for the Visayas (OPAV).
Matod ni Densing nga upat ka mga mayor sa Luzon ang giisyuhan og showcause order tungod sa pagluwat og EO nga nagtugot sa backride sa motorsiklo.
Si Densing niingon nga gibakwi sa mga mayor ang ilang EO.
Apan si Garcia niingon nga nahasubay sa balaud ang iyang EO ug ordinansahon nga tukion pa. Ang iya usab nga EO wa pa moepekto kay nag-agad kini sa ordinansahon nga iduso ug ipalabang.
“Tungod kay naa nay nihulga nako nga isuspenso kuno ko. Ihangad ko na lang ni sa kahitas-an. Nagsalig ko sa balaod. Isuspenso ko kay mao naman ang hulga kanako sa usa ka opisyal. Nan, dawaton ko na tungod ug alang kaninyo mga Sugboanon. Ang Provincial Board duna nay nag hulga sad. Ila nana sa ilang hukom. Apan labaw sa tanan, ang inyong kaayohan, ang inyong sitwasyon ang tagaan og pagtagad sa hunta probinsyal. Tabangi ko pag ampo," matod ni Garcia.
Sa Biyernes, Hunyo 5, 2020, ang PB motuki ug mopalabang og ordinansa nga magtugot sa backride sa motorsiklo basta kabanay ang magsakay.
Ang Bayanihan Act mohupas usab sa Hunyo 5, busa kadudahan pa kon duna pa bay ngipon ang no backride policy nga gilatid sa IATF. (REV/ANV)