Usa ang US-based Cebuano nga si Mercito Gesta sa mga gipangkonsiderar nga kuhaon nga kontra alang sa sunod nga away sa sumosulbong nga boksidor sa kalibutan nga si American Ryan Garcia.
Si Garcia, kinsa adunay impresibong 20-0, 17KOs nga rekord, gikatakdang moaway karong Hulyo 4 batok unta kang Jorge Linares, kinsa nagpuyo na karon sa Japan.
Apan gumikan sa kalisod sa pagbiyahe nunot ning padayong hulga sa coronavirus disease 2019 (Covid-19), naahat ang promoter nga hulipan si Linares.
Ubay-ubay ang gipilian apan dako ang posibilidad nga si Gesta maoy makuhang ipuli kang Linares gumikan kay naa na man kini sa Amerika nagpuyo ug aduna sab kini ikabuba.
Si Gesta, kinsa lumad nga taga Mandaue City ug gihulagway kaniadto sa Top Rank nga sumosunod ni Filipino boxing icon Manny Pacquiao, naggunit og 32-3-3, 17KOs nga rekord. / ESL