Negatibo sa coronavirus disease 2019 (Covid-19) ang tanang sakop sa NLEX Road Warriors.
Gikan kang coach Yeng Guiao ngadto sa mga magduduwa hangtod na sa mga trabahante sa Road Warriors ang nagpaubos sa Covid-19 tests niadtong Huwebes, Hunyo 4, 2020 sa NLEX Balintawak compound sa Caloocan City.
Aron maseguro nga dili mataptan ang ilang mga sakop, hasta ang mga miyembro sa tagsatagsa niini ka pamilya giapil sa Covid-19 tests.
“All NLEX Road Warriors players, coaches and staff , including utilities and ballboys tested negative for the virus,” opisyal nga pamahayag sa Road Warriors.
Aduna sab unta giandam nga swab testing alang unta sa mga miresulta og positibo. “But everything was OK,” dugang sa Road Warriors.
Ang Road Warriors maoy ikaduhang team gikan sa kampo sa Manny V. Pangilinan (MVP) group nga nagpaubos sa Covid-19 testing sunod sa Meralco Bolts nga nagpahigayon niini niadtong Lunes.
Ang sunod nga team sa MVP Group nga ipaubos sa Covid-19 testing mao ang TnT KaTropa nga nakaeskedyul sa sunod semana.
Ang Covid-19 test nahilakip sa mga tulomanon nga estriktong gipatuman sa Philippine Basketball Association (PBA) alang sa posibeng pagbalik sa aksyon sa liga.
Human niini, maghuwat na lang ang PBA sa pagsugot sa Inter-Agency Task Force on Emerging Infectious Diseases aron makabalik na og praktis ang ilang mga magduduwa.
Gawas sa Covid=19 testing, gipasa na sab sa Road Warriors ang ilang mga donasyon nga face masks ug face shield ngadto sa kang National Defense secretary Delfi n Lorenzana. / ESL