Usa ko nga nipakpak sa hilom sa dihang gipahibalo ni Gobernador Gwen Garcia nga usa ka executive order ang iyang pirmahan nga magtugot sa back riding sa mga nag motorsiklo sa probinsiya.
Gihangop nako ang maong lakang di lang tungod kay mao kini ang gusto sa katawhan. Gitan-aw nako ni sa anggulo sa tinguha sa gobyerno nga sa hinayhinay mapabaskog ang hilabihang luyaha nga ekonomiya dinala sa Covid -19.
Ang lakang sa gobernador dako og kahulogan alang sa mga kabus nga gihikawan sa makamatay nga virus sa ilang inadlaw nga panginahanglan. Dul-an baya sa tulo ka bulan kita nga nag-antos nga di makatrabaho.
Tungod niini nakit-an sa gobernadora ang kamahinungdanon sa motorsiklo isip paagi nga makasugod na ang mga tawo pagbalik og trabaho.
Galing lang kay ang mga eksperto sa Malakanyang nakakita sa tumong ug tuyo sa gobernador nga usa ka kahigayonan nga mas molapad pa ang problema sa Covid 19 tungod sa isyu sa social distancing.
Bisan sa klaro kaayong katarungan nga ang nag backride mao ang asawa, wa kini makapiog sa pag babag sa mga “eksperto” tungod sa “science” nga ilang gibasihan. Makalibog ang ilang rason.
Ang pamilya nga nag data data og motorsiklo kauban pirme sa balay. Gawasnon nga magkauban sa pagpangaon ug pagka tulog.
Pero sa pagsakay sa motorsiklo dili mahimo. Pero kon sa awto, multicab o SUV mosakay pwede ra? Unsa may diperensiya? Asa man ang “science” ani? Kay di tugtan nga mo-back ride, nang-hitch sa trak de karga. Nagdasok, nagpun sisok halos di na ka ginhawa. Asa may mas risgo, mag-back ride o mokapyot sa puno nang daan nga sakyanan?
Mentras tanto nga-nagnihit pa ang mga pangpublikong sakyanan sagupon ang gitinguha ni Gov. Gwen aron makabuylo na ta sa pagpanday sa nagusbat natong ekonomiya.
Ang mga protocol sama sa social distancing tumanon. Gawas nga gitabonan ang ulo ug nawong sa helmet, ang back rider ug driver mag sul-ob og face mask. Pero di gihapon ni kapasar kon ang mga eksperto sa Malakanyang ang pasultion.
Mao nga Gov. Gwen, salamat kaayo sa imong gugma sa mga kabus. Aprobahan o di kining imong lakang, di kita moundang sa pagpasabot sa mga nisupak. Way gustong mamatay tungod sa Covid 19. Apan labaw nga wa say gustong mamatay tungod sa kagutom.
Sama kang Mitchell Jagdon nga padayon pang nagpaalim sa mga luto sa duha niya ka tiil nga maoy iyang premyo sa pagbinaktas niadtong Lunes, Hunyo 1.
Kay way masakyan nagbaktas siya gikan sa Barangay Bulacao, Cebu City. Ang iyang distinasyon mao ang Osmeña Blvd. diim nahimutang ang gamay niyang tindahan nga nasira sukad pa niadtong hinapos sa bulan sa Marso. Tungod kay di ma maantos ang kasakit sa iyang mga tiil, gi-rescue siya gamit ang biseklita dapit sa may CIT sa Natalio Bacalso Ave.
Dili man unta ni mahitabo kon gitugutan pa nga makaangkas sa motorsiklo nga gimaneho sa iyang bana. Pila kaha ka buok ang may susama og kasinatian ni Mitchelle gikan niadtong Lunes hangtod karon?