Naghari pa ang kahadlok sa Covid-19 sa daghang hinungdan ilabina kay wala pay nakaplagang tambal. Sama sa kagaw gikan sa kwaknit ug bitin, hinimo sa laboratoryo sa China isip bioweapons, gipalakaw nga pandemic ni Bill Gates nga mipintal og itom nga paghulagway aron pagkontrolar sa kalibotan, sintonado nga interpretasyon ni DOH Sec. Francisco Duque nga milapdos na ang second wave ug ang pagsaka sa gidaghanon mahinumdoman kadtong paghugpa sa Spanish Flu sa 19181919 nga nagsugod sa England mikatay sa kanasoran, 50M ang patay lakip sa 80,000 ang nakalas dinhi sa Pilipinas.
Ingon og matibhangan ang kabalaka sa gipagawas nga 1datus ni Dr. Rene Bullecer, presidente sa Aids-Free Philippines nga sulod sa 45 ka adlaw, 10 ra ka pasyente ang namatay sa Covid-19 matag adlaw kon itandi sa nakalas sa sakit sa kasing-kasing nga 236, cancer nga 180, highblood nga 167, pneumonia nga 160 ug diabetes nga 144 matag adlaw.
Ang 10 nga namatay sa Covid-19 lalisonon pa kay dunay komplikasyon sa laing sakit. Rebelasyon sa DOH nga sulod sa tulo ka bulan mas daghan pa ang natakdan ug nakalas sa dengue ug tuberculosis.
Buot ipasabot napalong na ang kalala sa Covid-19 nga giingong dili mabuhi sa 28 degrees celcius nga kainiton ug duna nay herd immunity ang katawhan nga dili daling madutlan. Kamatuoran Nangulabting pa ang kahadlok nga ang mga positibo polos asymptomatic.
Tukma ang lakang nga mao ray ipaubos sa PCR test kadto lamang dunay acute respiratory disease, influenza-like-illness, nabantang sa positibo ug dunay travel history.
Si Gov. Gwen Garcia gidasonan ni DOH 7 Dir. Jaime Bernades sa ilang awhag nga lig-onon kanunay ang immune system pinaagi sa sustansyadong pagkaon, bitamina ug pagsagop sa kinaraan sama sa tuob, inom sa linaga nga luy-a, dulaw ug lemonsito.
Gani, giumol sa siyudad sa Sugbo ang Task Force Tuob. Si Garcia mitataw nga milanat nag taas nga pag-antos nga napugngan ang kalamboan nga angay nang ibalansi ang panglawas ug ekonomiya.
Mga negosyanti mihangyo ni Mayor Edgar Labella nga buksan na ang patigayon sa siyudad. Sec. Carito Galvez, chief implementor sa national task force pabor nga kadto lang barangay nga taas og kaso maoy i-lockdown.
Hunyo 1-15 gilugak ang nasod sa general community quarantine (GCQ). Sa latos sa Covid-19 nahunlak ang ekonomiya. Liboan ka mga OFW ug minilyon ka trabahante ang nakulban sa panginabuhi. Enrollment sa nalangay nga klase nagsugod Hunyo 1 pangandam sa Agusto 24 nga blended/distance learning pinaagi sa radyo, telebisyon ug internet.
Hinuon duna pay kausaban kay daghang wala makauyon sa online class sanglit maoy naandan ang face-toface classes. (csa_1156@yahoo. com/09064648954)