Karon nga medyo gilu-ag-luagan na gamay ang mga pama-agi sa COVID-19 quarantine, hinay-hinay na sab og pamalik ang mga mamumuo sa ilang mga trabahoan og naandang ginbuhaton.
Ang akong lindog karon naglatad sa bag-ong normal nga mga ginbuhaton og mga kalihukan nga wa pa gipang libkas.
Sa bag-ong gipagawas nga Cebu GCQ (general community quarantine) protocol, kining mosunod maoy bag-ong normal nga ipadayon:
Ang pagsul-ob og face masks nga makatabon sa ilong og baba, ang pagdistansiya og mga usa ka metro sa usag-usa (social distancing), ang curfew para sa tanan (way pili ma bata o edaran) gikan sa alas 10:00 sa gabii hangtod na alas 5:00 sa buntag gawas niadtong exempted ini, ang mga edaran (60 anyos pataas) ug mga batan-on (21 anyos pa ubos) padayon nga gidid-an sa pag gawas-gawas sa ilang pinuy-anan apan kon di kalikayan unya kinahanglan gayod nga mogawas, dad-on kanunay ang quarantine pass.
Ang pagkaon sulod sa mga restaurant gitugtan na apan gi-limit pa gihapon ang gidaghanon sa makasulod nga customer kay katunga ra o 50% sa naandang gidaghanon nga customer ang mahimong pasudlon.
Sa laing bahin, kining mosunod maoy padayon nga gipangdili hangtod karon: ang pag suroy-suroy o lakwatsa, pag-angkas o backride sa mga habal-habal o motorsiklo, panpundok-pundok kon dun ay selebrasyon, pagsimba, bible study, pulong-pulong, o sulod sa mga lugar nga daghang tawo sama sa casino o lugar sugalanan, paugnat sa kusog (basketball, volleyball) sa pampublikong duwa-anan, ug pag-inum og ilimnong makahubog sa pampublikong imnanan.
Ang bag-ong rituwal nga angay anaron mao ang pag-inom og tubig 8-10 ka baso kada adlaw, inum og init nga salabat o Turmeric ka 1 o 2 kada adlaw, kaon og daghang preskong utanon o prutas, pagkatulog og 7-8 ka oras kada adlaw, insaktong pahuway, balansi nga diyeta, pag-inum og vitamins para di dayon dali matakdan sa mga sakit-sakit.
Sa katapusan, anara ang kaugalingon sa kanunay nga paghugas sa kamot.