Human nisulti si Presidente Rodrigo Duterte nga di siya makahatag sa gipangayo sa mga lider sa Sugbo sa pagtugot sa backride sa motorsiklo, si Gobernador Gwendolyn Garcia nibakwi sa iyang Executive Order 19 agi og respeto sa Presidente.
Matod ni Garcia nga iya nang gihimo ang tanan aron unta ang mga Sugboanon makagamit na sa ilang mga motorsiklo isip transportasyon samtang pakyas ang ubang mga ahensya sa gobyerno sa pagpadagan sa ilang gisaad nga mga bus ug modern jeep.
Si Duterte nihinumdom sa makabungog nga botos nga gihatag sa mga Sugbonoan kaniya niadtong 2016 elections.
Apan matod niya nga di siya makahatag sa gusto nila ni Garcia ug sa board members kay basin ikiha siya. Apan dunay punto ang pito ka mga kongresista nga sama sa giusab sa kadagkuan sa Department of Transportation (DOTr), inabagan sa Department of Health (DOH), nga nagtugot unta sa pag-angkas sa motorsiklo sa mga kabanay.
Di makalabaw sa balaud ang mando sa usa ka ahensya o mga ahensya sa kagamhanan. Kay gitugot sa balaud, di illegal ang pagpaangkas.
Huyang ang ilang gihimo nga katarungan. Kay kuno ang pag- angkas sa motorsiklo nagbutang sa kakuyaw sa pagpanakod sa novel coronavirus. Matod ni Department of the Interior Secretary Eduardo Año nga duna kunoy pamilya nga nagtakdanay tungod sa angkas sa motor.
Natural man nga magtakdanay ang pamilya kay nagpuyo lang sila sa usa ka bubung. Naa bay magtiayon nga mag-social distancing sa ilang panagdulog sa gabii? Naa bay kabus nga pamilya nga mag social distancing sa pagpangaon sa gamay kaayong lamisa?
Gibasa ba kaha sa Presidente og maayo ang manifesto sa mga Sugboanong kongresista nga naghisgot og balaud? Duna ba kahay igong sayantipikong pagtuon nga ang angkas kuyaw sa Covid o imahinasyon lang kini?