Nabungkag ug nagdinaganay ang gihimong lihok protesta sa mga militanteng pundok sa dakbayan sa Sugbo atubangan sa University of the Philippines Cebu sa dihang gipangdakop sa kapulisan niadtong Biyernes, Hunyo 5.
Gikondenar sa mga nagprotesta ang bag-o lang napalabang sa Ubos Balay Balaoranan nga Anti-Terrorism Act of 2020.
Ilang gihulagway nga dili maki-angayon ug mahimong ma-abusohan lang kini sa mga tinugyanan sa balaod aron lisud-lisoron ang mga tawo nga mosupak sa gobyerno.
Walo sa mga nagprotesta ang gipang-pusasan ug gidala sa kampo sa Cebu City Police Office nga naglangkob nila ni: Jaime Paglinawan, Bayan Central Visayas; Joahanna Veloso, 22, associate vice president sa National Union of Students of the Philippines; Bern Canedo, 21, UP Cebu student council vice president; Dyan Gumabao sa Babataan Party List; Nar Porlas sa Anak Bayan UP Cebu; Janry Ubal. 29, sa ‘Food Not Bombs Cebu’; Ai Ingking, 26, UP Alumnos ug Clement Ventic Corominos, 19.
QUARANTINE PERIOD PA
Matod ni Police Brigadier General Albert Ignatius Ferro, hepe sa Police Regional Office (PRO) 7 nga gipangdakop ang mga militanteng pundok tungod sa kalapasan sa General Community Quarantine guidelines sa pagdili sa panagtapok atol sa quarantine period tungod sa Covid-19 pandemic.
Matod ni Ferro, naghatag og risgo sa mga tawo ang gihimong panagpundok sa mga nagprotesta sa kabalaka nga mokuyanap o matakdan sa virus ilabi na nga ang siyudad sa Sugbo gihulagway nga kritikal area nunot sa padayong pagsaka sa mga nagpositibo sa Covid-19.
“We are not against the expression of mass protest if its only on normal situation,” dason pa ni Ferro.
Ang Cebu City Police Office human masayod sa gihimong lihok protesta sa mga cause-oriented group dali nga nagpadala og mga pulis aron badlongon sa ilang gihimo.
Giingong nagdumili ang grupo sa militanteng pundok sa pagsanong sa hangyo sa kapulisan hinungdan nga nahitabo ang dinakpanay nga miresulta sa pagkasikop sa walo ka tawo.
Dali nga nanagan ang mga raliyesta sulod sa campus apan gipanggukod sa mga pulis ug ang mga nadakpan gipangpusasan.
Giduphan sa opisyal ang pagsulod sa mga pulis ngadto sa tunghaan sa UP diin nahitabo ang dinakpanay tungod kay nasulod pa kini sa hot pursuit operation.
“They went inside the UP campus so unsa to parang akala nila they haven’t done wrong na magpasok sila sa UP para lang ma safety sila? No, they have assaulted those persons in authority that is a violation of the law,” matod ni Ferro.
NAAY QPASS
Apan matod ni Joahanna Veloso, usa sa mga nadakpan, nga dili sila angayang dakpon tungod kay aduna silay dala nga mga quarantine pass.
Dugang pa niya nga sa wala pa sila magsugod sa ilang program gibadlong na unta sila ug wa pa-abota nga moabot sa tunga-tunga sa ilang programa sa dihang nahitabo ang dinakpanay.
“If mao jud na ilang tumong and tuyo dapat before pa lang daan ang protest, dapat gipangita-an nami nilag ing-ana para ma stop. Pero ila mi gistop in the middle na sa protest,” matod ni Veloso.
Nakadawat og impormasyon si Ferro nga gawas sa mga hamtong na nga mga reliyesta aduna pay mga menor de edad nga misalmot sa gihimong lihok protesta apan dali kini nga nakadagan pasulod sa campus sa UP.
Tungod niini nimando karon si Ferro sa iyang mga tawo sa pag-imbestigar kon unsa kini ka tinuod ang maong taho.
Sa higayon nga masuta nga nigamit kini og mga menor de edad dugang kaso ang ipasaka sa kapulisan ngadto sa leader sa grupo nga si Paglinawan.
Si Paglinawan, sa iyang bahin, nitiyabaw tungod sa giingong dili tawhanon ang pagdakop kaniya.
Matod niya gituok siya sa usa ka pulis sa dihang gidala siya sa sakyanan ug nasakitan usab siya sa iyang kamot tungod sa kahugot sa pagkataod sa pusas.
“Pag-aresto sige ko pangutana unsa akong nalapas nga balaod wala nitubag igo ra posasan, bunlot, gituok, giyak-an, natumba ko. Tabangan kog layog aron madakop,” matod ni Paglinawan. / AYB