4 bag-ong kaso sa Covid-19 sa Minglanilla

Mapa sa Minglanilla, Sugbo. (Google Maps)
Mapa sa Minglanilla, Sugbo. (Google Maps)

UPAT ka positibong kaso sa coronavirus disease (Covid-19) ang nadugang sa lungsod sa Minglanilla, Sugbo Sabado, Hunyo 6, 2020.

Kini mao'y gipahibaw sa lokal nga kagamhanan sa lungsod pinaagi sa official Facebook page niini.

Natala ang una nga pasyente nga usa ka frontliner sa City Health Office.

Ang pasyente usa ka 55-anyos nga babaye nga taga Lower Pakigne. Matod sa Rural Health Unit nga asymptomatic o walay gibati nga simtomas sa Covid ang pasyente.

Nagpositibo usab ang 57-anyos nga babaye nga kauban sa unang pasyente sa panimalay. Nakasinati kini og pag-ubo.

Ang duha gipaubos na sa home isolation.

Natala ang ikatulo nga kaso nga mao ang 30-anyos nga babaye nga nagtrabaho sa pampubliko nga ospital sa Dakbayan sa Sugbo. Ang maong pasyente nagpuyo sa usa ka subdivision sa Upper Linao.

Samtang ang ikaupat nga pasyente mao ang 28-anyos nga babaye nga taga Lower Calajoan ug nagtrabaho sa Dakbayan sa Talisay.

Sugdan na sa pangagamhanan ang contact tracing ug ang pag-disinfect sa lugar nga may mga positibong kaso sa Covid.

Nanawagan ang lokal nga kagamhanan nga dili mokumpyansa ug kanunay nga subayon ang mga health protocols aron dili na mapun-an pa ang mga positibong kaso sa lungsod.

Sa kinatibuk-an, nakatala na og 47 ka mga positibong kaso ang lungsod. (ANV)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph