MAKIGHUGPONG si Philippine Basketball Association (PBA) Commissioner Willie Marcial sa mga representante sa matag miyembrong team karong Hunyo 23, 2020 aron i-finalize ang tanang mga detalye kabahin sa pagbalik sa liga.
Ang labing mahinungdanong tukion sa maong panaghugpong mao ang pagseguro sa kaluwasan sa mga magduduwa ug sa tanang mga nahilambigit sa duwa.
“Magpapatawag tayo ng dialogue, we’ll reach out to the players,” matod ni Marcial nga napatik sa www.pba.ph. “Kukunin namin yung consensus nila, yung opinion nila, kung ano ang tingin nila doon sa mga gagawin natin. At the same time, mapapaliwanag ko rin sa kanila yung mga protocols na gagawin kung payagan na ang PBA teams na makapag-practice.”
Human giaprubahan sa Board of Governors, ang PBA ningsumiter sa gihan-ay nilang mga tulomanon alang sa ilang pagbalik ngadto sa Inter-Agency Task Force on Emerging Infectious Diseases.
Kon motugot na niini ang IATF, hayan makabuylo na ang PBA kabahin sa ilang planong pagbalik og duwa.
“I think the dialogue Commissioner Willie will do is to assure our players that we’re doing all we can to make (basketball court) safe,” matod ni PBA Board chairman Ricky Vargas.
“We should assure the players that they will be safe and that proper testing will be done.”
Ipasabot ni Marcial ngadto sa mga magduduwa nga kinahanglang magpa-Covid-19 testing ang tanang mga magduduwa una kini tugotan nga maka-ensayo.
Ipaubos sab ang tanang mga magduduwa sa rapid test, swab test, ug laing rapid test inig labay sa 10 ka mga adlaw.
Unom ra sab ka mga tawo ang tugotan atol sa training session, upat ka mga magduduwa, usa ka trainer, ug usa ka health officer.
“Kung apat sila, walang dalawahan, walang scrimmages, walang game. Conditioning lang talaga,” pasabot ni Marcial. “Biruin mo, apat kayo sa isang court. Kaya yung social distancing, magagawa natin.” (ESL)