GIPASALIG ni University of the Philippines (UP) Fighting Maroons star forward Kobe Paras nga motabang siya sa pagpiyansa sa gipangsikop sa kapulisan nga mga nagprotesta sa UP Cebu isip pagpadayag sa ilang pagsupak sa anti-terror bill, taho sa www.abs-cbnnews.com.
Pito ka mga tawo nga ning-apil sa rally batok sa Anti-Terrorism Act of 2020 atubangan sa UP campus sa Lahug, Cebu City niadtong Hunyo 5, 2020 ang gipangdakop sa kapulisan sa alegasyon nga nakasupak kini sa general community quarantine (GCQ) nga gipatuman nunot sa hulga sa coronavirus disease 2019 (Covid-19).
Si Paras nagpadayag sa iyang mga sentimento sa social media sa milabayng semana kabahin sa #BlackLivesMatter campaign sa Amerika ug #JunkTerrorBill nga mga protesta sa Pilipinas.
Gi-retweet sab ni Paras ang posts sa artistang si Anne Curtis ug beauty queen Pia Wurtzbach nga dayag sa ilang pagsupak sa House Bill 6875.
Ang kauban ni Paras nga si Ricci Rivera nipadayag sab sa iyang intensyon sa pagtabang sa nangabalhog sa bilangguan nga mga demonstrador sa Sugbo.
Si Rivero, kinsa nasayod sa insidente gikan sa laing sakop sa Figthing Maroons nga si Jun Manzo, nakigtambayayong ni Nowhere to Go UP president Renan Dalisay alang sa iyang paghatag og pinansyal nga suporta alang sa pagpiyansa sa mga demonstrador.
Si Manzo taodtaod sab nga nagpuyo sa Sugbo gumikan kay kanhi kini magduduwa sa University of the Visayas (UV) Green Lancers.
Ang mga nangapriso mao sila si Bern Cañedo sa Youth Act Now Against Tyranny Cebu; Dyan Gumanao sa Kabataan Partylist; Al Ingking, kanhi estudyante sa UP Cebu; Jaime Paglinawan sa Bagong Alyansang Makabayan; Joahanna Veloso sa National Union of Students of the Philippines; Nar Porlas ug Janry Ubal sa Food Not Bombs Cebu.
Alang sa mga nag-rally, supak sila sa 2020 Anti-Terrorism Act sa pagtuo nga puwede kining abusaran sa mga awtoridad aron dakpon ang mga kritiko sa gobiyerno.
Sa taho sa SunStar Cebu, igsuong buhatan ning mantalaan, nagkanayon si Police Brigadier General Albert Ignatius Ferro, Police Regional Office (PRO) 7 director, nga ang mga nag-rally naghatag og kuyaw sa kaluwasan sa mga Sugboanon gumikan kay tatawng wala kini nagtuman sa social distancing.
Bisan gipaubos na man tuod ang dakbayan sa Sugbo sa General Community Qurantine (GCQ), wala pa gihapon gitugotan sa gobiyerno ang mga kalihukan nga makapatapok og daghang mga tawo.
“Because we are in the pandemic situation, ngano man sila mag protest diha? They are just exposing if they have the disease. They are just spreading the disease to other people so that’s why we are preventing. We are not against the expression of mass protest if it’s only in a normal situation,” pasabot ni Ferro.
Ang kapulisan ningpahimangno sa mga aktibista nga undangon na ang ilang pagprotesta apan nagmagahi hinungdan nga gipang-aresto kini. (ESL)