NATUGAW ang kabuntagon sa Biyernes human magubot ang usa ka rally batok sa anti-terror bill. Gidakop sa mga pulis ang giingong mga lider sa mga raliyista ug natanggong sa Cebu City Police Office (CCPO).
Wa sila dakpa tungod sa ilang pagsupak sa anti-terror bill, apan tungod sa giingong panagtapok sa mga militanteng pundok panahon sa general community quarantine. Giingong nakalapas sila sa quarantine protocol ug pagsupak sa mga pulis.
Gihimo gud nga isyu ang panagtapok sa mga barangay kapitan sa dakbayan sa Sugbo nga nanambong sa giingong briefing sa Department of Health. Bisan panagtigom tuod kadto,di birthday party, di malikayan nga matandi ang ilang panagtapok sa panagpundok sa mga nanagprotesta.
Kon propaganda ang hisgutan, nakapuntos ang mga militante sa pagdakop kanila sa kapulisan kay ang mga hulagway ug video footage, nagpakita sa mga raliyista nga yanong gidakop bisan duna silay katungod sa pagsaway sa balaudnon nga pirmahanan ni Presidente Rodrigo Duterte.
Tuod nagtapok sila bisan panahon sa GCQ, apan duna nay mga panagtapok sa mga opisyal sa kagamhanan. Unsa may kalainanan niana? Mas luwas pa gani ang rally kay naa sa gawas, di sama sa panagtigom nga naa sa sulod.
Unta, gibadlong sa mga pulis ang mga nagprotesta ug gipaabot nga mabungkag ra sila human sa ilang programa. Wa na lang sila hilabti.
Hayan, ang mga militante nakakita sa risgo nga dakpon sa ilang rally, apan ilang nakita ang maayong kahigayunan.Nakapadayag sila sa ilang kawsa batok sa balaudnon, nakakuha pa sila og simpatiya sa publiko, di tuod kinabag-an, apan daghan.
Nagtakilid ang kapulisan sa isyu kon propaganda ang hisgutan. Kon wa pa lang nila hilabti ang rally sama sa ubang kalihukan, wa untay nakadungog ug nagpakabana sa singgit sa mga militante.