KANIADTO, naglisod mig kombinser sa mga tawo nga ang biseklita maayo kaayo nga alternatibong transportasyon. Wa ni magsalig sa moderno ug nagkinhananglan og mga galamiton nga komplikado. Karon sa pandemic, daghan nang nag-bike.
Kon mobiyahe ka, nagkinahanglan ka lang og pump nga gamay, tapak ug lugit. Wa na kinahanglana pang moadto ka og vulcanizing shop kay naa ra may mga tapak nga mapalit sa bikeshops nga ipapilit sa interior.
Ingon niana ka sayon ug ka simple ang biseklita. Low kaayo og maintenance. Di sama sa mga sakyanan nga de motor nga nagkinahaglan og extensive nga maintenance. Bisan gani ang akong scooter mag-ilis kog oil kada buwan. Ang pait kon ma-flat, magduot, mangitag vulcanizing shop aron matapakan. Kadaghan na ko makasuway ani. But sa biseklita, kon ma-flat ug duna kay tapak ug bomba, daug na.
Sa ka simple sa biseklita as a mode of transportation, perfect kaayo ni sa panahon sa kalisod, paglikay sa mga sakit ug uban pa. Panahon sa Covid-19, wa ka na kinahanglana pang mosagol sa mga tawo sa public transportation kay naa ka na may biseklita nga magamit.
BIKE TO WORK
Ang akong anak nga si Marylove, nagtrabaho sa usa ka interior design company sa Banilad. Sa unang semana sa Hunyo o sa unang duha ka adlaw, wa siya makatrabaho kay way public transportation. Sa Hunyo 3, alas 11 na sa buntag siya nakasakay. Maayo gani kay dunay mga good Samaritan nipasakay niya.
Niadtong Biyernes, nagsugod na siya sa iyang bike to work. Iya nang gigamit ang iyang mountain bike. Apan gikinahanglan niyang magdala og sapot kay sington kag tindak. Maayo unta lagi kon ang mga kompaniya mobutang og ilisanan ug shower sa mga kawani nga mag bike to work. Di baya ni lisod ug di sab mahal.
Maayo kaayo ni alang sa mga kawani, sama sa akong anak, nga magbiseklita padung sa trabahoan ug pagpauli. Ang nakaayo sa biseklita, kay exercise man, sagad maayo og panglawas.
BIKE TOUR
Ang mga European hilig kaayo og biseklita. Daghan usab kanila ang nag-bike tour. Mobiyahe sila og usa ka nasod ug magtabok tabok sa boundaries. Magbutang lang sila og mga bike back rack ug bike bag sa ilang biseklita, maka tour na sila.
Dako ang ma save sa pagtindak ug hinay ang pace, malingaw kang segurado sa paglibot sa nagkadaiyang mga lugar. Maka interact ka pa sa mga tawo sa mga dapit nga imong giduaw. Sa hinay nga biyahe, mas makadayeg ug mas makakita ka sa kaanindot sa lugar.
Mao bitaw nga kon akoy papilion, kon mobiyahe, mas nindot gamiton ang two-wheeled transport kay sa four-wheeled nga covered. Mabusog imong mga mata sa mga talan-awon.