SUPERBALITA CEBU

Super blowout: ‘Siya ang tubag sa akong pag-ampo’

KADAGHANAN sa mga babaye, sa dili pa maminyo, mangayo og giya sa Ginuo ug mag-ampo nga mahatagan og pares nga ilang ikauban sa tibuok kinabuhi nga andam sila higugmaon kon kinsa ug unsa sila. Ug makabuhi nila ingon man sa ilang umaabot nga mga anak.

Sama ni Evangeline Cuyno, kinsa magkanunayan sa Blessed Sacrament sa Santo Tomas de Villanueva Parish sa Barangay Poblacion Pardo, siyudad sa Sugbo ug mag-ampo.

“Kita mga babaye, gi-wish nato makakita og lalake nga buotan... Mag-ampo ta nga “Lord, bahala dili siya gikan sa well-off family basta buotan ug masinabtanon. Kanang kaya ko buhion ug ang among mga anak,”” paambit ni Evangeline.

Ang iyang pag-ampo gidungog sa kahitas-an pinaagi sa iyang nabana nga si Saint Phol Cuyno. Una silang nagkita sa usa ka kalihokan sa mga batan-on sa parokya didto sa lungsod sa Alcoy.

Apan pormal sila nagkaila niadtong 1995 sa sud sa simbahan sa parokya atol sa lubong sa amahan ni Evangeline diin ang ig-agaw niini nga si Doray maoy nagpailaila sa duha.

Si Phol maoy assistant sa usa sa mga pari sa parokya nga si Padre Restituto “Titing” Padilla.

Giangkon ni Evangeline nga unang pagkakita niya kang Phol na-crush siya niini tungod kay gwapo, puti og pamanit ug maayo og barog.

Bisan kon dunay mga panahon nga na-busy si Phol, mangita kini og paagi nga makauban si Evangeline.

Ang duha nahiusa sa bugkos sa kaminyuon niadtong Mayo 14, 1998 sa samang parokya. Pito ka mga pari ang nikonselebrar sa ilang kasal. Kini naglangkob nila ni Msgr. Jose Montecillo, main celebrant; Padre Isabelo Abarquez nga maoy nagwali ug karon usa na ka obispo; Padre Padilla; Padre Teogenes Herrera, Padre Bobby Paraguya, Msgr. Eliseo Gamallo ug Msgr. Jojo Dosado.

Ang duha gipanalanginan og duha ka mga anak sila si: Maria Justine Eve, 21; ug Maria Justine Angelie, 19.

Niadtong Mayo 14, 2020, gisaulog nila ni Phol ug Evangeline ang ika-22 nga anibersaryo sa ilang kaminyuon.

Ang kasaulogan gisugdan pinaagi sa ilang pagsimba sa live streaming sa misa sa Basilica Minore del Santo Niño de Cebu pagka buntag sa maong adlaw.

Tungod kay ubos pa sa General Community Quarantine ang tibuok Sugbo, usa ka simple nga selebrasyon ang ilang gibuhat sa ilang panimalay. (SCG)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph