IPAUBOS sa swab test ang 20 ka mga tawo nga taga dakbayan sa Danao human nakahimamat sa duha ka mga bag-ong pasyente sa coronavirus disease (Covid-1) sa siyudad.
Atol sa live update sa Danao City Government sa Hunyo 5, 2020, gipahibaw ni Danao City Mayor Ramon “Nito” Durano nga gi lockdown na sa lokal nga kagamhanan ang duha ka mga barangay kon asa nagpuyo ang mga positibo sa Covid-19.
Kini mao ang Purok 2 Beatriz Durano st.,Bbarangay Poblacion, kon asa nagpuyo ang 32-anyos nga babaye nga na admit sa Vicente Sotto Memorial Medical Center (VSMMC) sa Abril 28 human nanganak.
Samtang ang usa mao ang Purok Sambag, Barangay Guinsay, kon asa nagpuyo ang 67 anyos nga lalake nga na admit human nakasinati og influenza like illness (ILI) nga simtomas sa Covid-19.
Gipahibawo ni Durano nga ubos sa guidelines, kon may i lockdown nga sitio o barangay, ang Dakbayan na ang mohatag og supply sa mga gikinahanglan sa pamilya. Nanawagan ang Dakbayan sa Danao sa mga konstituente niini nga mosunod sa patakaran ug lagda sa Siyudad ug sa Department of Health (DOH) aron malikay sa pagtakod sa Covid-19.
“Mohangyo ko sa inyong pagsabot ug mamalihug ko sa inyohang kooperasyon sa pagsunod sa tanang mando aron dali kini nato nga masulbad,” matod ni Durano. (ANV)