PATAY ang usa ka 49 anyos nga lalakeng manindahay og isda human dunggaba sa makadaghan sa habalhabal driver alas 3:30 Sabado sa kaadlawon, Hunyo 6 sa Skyview Hills, Barangay Apas, Siyudad sa Sugbo.
Panagribal sa usa ka babaye maoy gituohang motibo sa pagpatay. Ang biktima giila nga si Edward Daan Amaquin, kinsa nag puyo ra usab sa lugar.
Ang suspek giilang si Ismael Manila, 45, taga sitio Tarcon, Barangay Lahug, Siyudad sa Sugbo.
Matod ni Police Master Sergeant Antonio Din, imbestigador sa Mabolo Police Station, nga padung moadto sa Pasil si Amaquin aron mangomprag isda.
Iyang kuyog ang iyang kinugos nga si Junlee Porcadilia, 20, sakay sa multicab dihang kalit nga niabot si Manila sakay sa iyang motorsiklo.
Gihunongan usab kini ni Amaquin, apan sa dihang nakaduol na, gikalitan og dunggab ang nahauna.
Samtang si Porcadilia dali nga nakaambak ug nidagan human makita nga nagkadugo si Amaquin.
Nakaangkon og mga samad sa lawas lakip na sa mga kamot si Amaquin kinsa namatay diha-diha.
Gihimo dayon ang manhunt operation pinaagi sa pag-adto sa balay ni Manila, apan wa na maabti pa.
GUGMA
Love triangle ang usa sa gitan-aw nga motibo human masuta nga ang kapuyo ni Amaquin kanhi kapuyo ni Manila.
“Kaning namatay mao ni silbing kapuyo ron sa kapuyo sad kaniadto sa suspek. Mahulog ni nga love triangle,” matod ni Din.
Ang babaye ug si Manila giingong duna say anak.
Wa pa matino sa kapulisan kon unsa nga sirkumstansya nagkabuwag sila si Manila ug iyang kapuyo.
Gituohan sa mga silingan ni Manila nga naa sa mga kabanay niini sa bukirang dapit sa siyudad sa Sugbo nag tago-tago.
Giingong nagbahad na si Manila sa biktima nga iyang patyon tungod sa pagpakig-ipon niini sa iyang kanhi live in partner sigun sa mga estorya sa mga silingan.
Awhag sa kapulisan kang Manila nga motahan.
Giandam na usab ang kasong murder nga ipasaka sa Mabolo police station ugmang adlawa sa korte sa dakbayan sa Sugbo.