TALIWA sa kalisod karon nga nasinati panahon sa epedemya sa coronavirus disease (Covid-1), dunay mga tawo nga mingpakita sa ilang kalumo sa kasingkasing nga natandog tungod sa usa ka hitabo.
Sa usa ka post sa social media, natandog ang balatian ni manlalaban John Eddu Ibañez, executive secretary ni Mandaue City Mayor Jonas Cortes, hinungdan nga siya naaghat sa pagpasawo sa iyang gamay nga grasya.
Personal siya nga mipasiugda sa “bike for free” campaign alang sa mga Mandauehanon nga nanginahanglan og bike.
Ni-post si Ibañez sa iyang Facebook nga manghatag siya og tulo ka mga BMX nga bike.
Ang uban sa iyang mga higala ug kaila nga nakakita sa post, na-inspire sab ug nidugang og bikes.
Gikan sa tulo, niabot na 23 ka mga biseklita ang mahatag ni Ibañez.
IDEYA
Kada gabii nga mag-roving si Ibañez sa Dakbayan sa Mandaue, nakabantay siya nga ubay-ubay ang naggamit og biseklita padung uli.
Mas daghan sab siyang nakita nga naglakaw lang padung uli sa panimalay.
Nakaamgo si Ibañez nga ang gipadagan nga mga pampublikong sakyanan sa gobyerno di igo nga makapasakay sa mga pasahero labi na nga wa pa makabyahe ang mga jeep.
Nipaambit sab si Ibañez sa iyang inspirasyon nga mopadayon sa “bike for free” campaign tungod sa usa ka nag-viral nga Facebook post.
Kabahin kini sa usa ka tag-iya sa bike shop nga mihatag og bike ngadto sa 82 anyos nga lalake nga magsige og adto sa maong shop aron paliton ang P4,800 nga bike og P2,000.
Inay ipapalit, gihatag sa tag-iya sa shop ang maong bike.
Ila usab nga nahibaw-an nga ang maong tiguwang maglakaw gikan sa Taguig paingon sa Makati aron mamaligya og candy.
“Pagkita nako ato ba, maorag nakahilak ko nga nag tan-aw sa tiguwang bitaw nga makita nimo sa iyang nawong ang kalipay,” sigon Ibañez.
“Bisan pa sa nahitabo kay naa gihapon tay blessings nga nadawat ba. So we have to pay it forward,” dugang niya.
Nanawagan si Ibañez sa mga adunay kaila nga angay nga makadawat og bike o tan-aw nila nga angay sila nga makadawat, mamahimo silang mohatod sa ilang mensahe ngadto sa iyang Facebook account.
Kutob lang sa 11:59 p.m. sa Dominggo, Hunyo 7, 2020 modawat si Ibañez og mga mensahe.
Gitan-aw ni Ibañez kadtong mga indibidwal nga way ikapalit og bike, kadtong mag-bike paingon sa ilang trabaho ug gamiton ang bike alang sa ilang panginabuhi ang makadawat.
Nibutyag si Ibañez nga aduna siyay nadawat nga mensahe sa usa ka pag-umangkon sa tricycle drayber nga mipaambit sa sitwasyon sa iyang uyoan nga maglakaw lang gikan sa ilang balay paingon sa garahean sa traysikol.
Human kini mamasada, maglakaw na sab kini gikan sa garahean paingon sa ilang balay.
Niadtong Sabado, Hunyo 6, 2020, nakadawat na si Ibañez og 70 ka mga mensahe.
Sa Lunes, Hunyo 8, 2020, mahatag ni Ibañez ang 23 ka mga bike ngadto sa mga mapilian.
“Thank you so much to our generous donors for making this campaign a reality. This means a lot to those who will receive them,” sigon ni Ibañez sa iyang Facebook post. (KFD)