GIKUMPIRMAR ni Tagoloan Mayor Enan Gomer Sabio nga duha ka taga lungsod sa Tagoloan ang nagpositibo sa gipahigayon nga rapid testing sa coronavirus disease.
"Kabahin sa gikaingon ug nabaniog nga naay nagpositibo dili angayan nga atong ilimod sa katawhan, tinoud duha ka positibo, babae ug lalaki," kini ang pahayag ni Sabio sa usa ka interbyu sa sibyaan sa radyo Hunyo 6, 2020.
Gipasabot niini nga usa kini ka babae nga taga Baluarte, lungsod sa Tagoloan, Misamis Oriental.
Niadto og Manila kay mo-abroad unta apan naabtan kini sa lockdown hinungdan nagsideline na lamang kini didto sa kaulohan sa pagmanicure.
Gikonsidera kini nga locally stranded individual (LSI) kinsa niabot kini gikan sa kaulohan niagi lang semana ug awtomatiko nga gipahimutang sa isolation facility diha sa Baluarte.
Gikuhaan og swab test apan sa bag-ong resulta negatibo sa real-time polymerase chain reaction (RT-PCR) nga maoy gikonsidera sa Department of Health nga confirmatory test sa Covid 19.
"Gi- rapid test ni siya og nagpositive siya pero dili man kini kabalak-an mao nga gidala sa Baluarte pagka sunod adlaw gi swab test ug nag-negative sa swab test," pasabot ni Sabio ug miingon nga sa pagkakaron anaa kini gipahimutan sa isolation facility ug sa pagsulat ning balita anaa na sa ika 12 ka adlaw.
Kung matapos kini sa iyang kwarantinas gitakda na usab kining ipaubos og laing 14 day quarantine.
Ang ikaduha nga nagpositibo sa rapid test mao kining lalaki nga nanginabuhi isip panday nga taga Mohon, Tagoloan ug bag-o lang niabot sakay og barko gikan sa Cebu.
"Gi-undergo gihapon siya og rapid test nagpositive, kagahapon gi- swab test isa ka adlaw wala pay resulta unta negative," pahayag ni Sabio ug miingon nga sa pagkakaron gibutang na sa isolation facility ug kasamtangan ang duha pulos mga asympthomatic.
Gipaabot ni Sabio nga nakurat siya nganong niabot kini sa ilang lungsod nga walay mga gipakita nga dokumento.
Una na nga gipasabot sa Department of Health nga dili ang resulta sa rapid test ang makonsidera nga konpirmasyon sa individwal nga naghambin og covid kay kinahanglan gyod nga ipaubos gyud sa (RT-PCR) test usa makumpirma nga kini nagpositibo gyod sa Covid 19.