ANAA sa liboan ka indibidwal ang napaakan og iro ug nabakunahan nga libre sa JR Borja General Hospital bisan sa pandemic kalabot na sa coronavirus disease (Covid-19).
Gibutyag ni Dr. Ramon Nery, chief of hospital sa JRBGH nga daghan ang napakaan sa mga mananap bisan sa kamandoan nga “stay at home” gumikan sa general community quarantine nga gipatuman sa wala pa nag modified general community quarantine (MGCQ).
Sugod sa Enero hangtod Mayo, 2020 anaa na sa total nga 2,338 ang mga nabakunahan human nga napaakan og iro diin sa Cagayan de Oro anaa sa 1,886; Misamis Oriental 348 ug Bukidnon 105.
Giingong daghan ang nabakunahan nga libre di lang sa Cagayan de Oro apan lakip sa mga kasikbit nga probinsya sama sa Bukidnon ug Misamis Oriental.
"Ambot ba ngano man nga stay at home man unta ang mga tawo ang mga iro siguro dili ga-stay at home," dalang pasi-aw nga pahayag ni Nery.
Gidugang pa niini nga maayo nalang kay libre ang bakuna sa JR Borja General Hospital. Naghangyo usab kini sa mga nanag-iya og iro nga mamahimong responsable.
"Panawagan ko lang let us have a responsible dog ownership kay mas maayo man gud nga sa iro ma control dili sa bakunahan ang tawo," dugang pa.
Giingong subo nga pamalandungon nga duna 'y mamatay tungod sa rabies.
"Naa na'y available nga vaccine sa rabies and yet naa pa gihapo'y gakamatay sa rabies. Unacceptable ni para sa ato, there should be zero rabies mortality," dugang pa.