GIPAHIBALO ang katawhan nga kinahanglan ang travel authority kon mobiyahe gawas sa Misamis Oriental.
Kini ang gibutyag ni Police Lieutenant Theofratus S. Pia ang spokesperson sa Misamis Oriental Provincial Police Office (MOPPO) kinsa nipasabot nga hugot kini nilang gipatuman kay tumong niini aron makontrolar ang mogawas ug mosulod sa lalawigan.
Dugang niini nga kinahanglan og travel authority ang mobiyahe paingon ug pagawas sa Misamis Oriental labina kon moadto ug mogikan sa Cagayan de Oro tungod kay kini nga siyudad gikonsiderang highly urbanized city, adunay kaugalingon administrasyon, adunay city director.
Ang siyudad sab adunay natala nga kaso sa Covid-19 hinungdan kinahanglan mahibaloan kinsa ang mogawas ug mosulod gikan sa dakbayan.
Lakip sa mga gabayan mao kining kung mobiyahe paingon ug gikan sa Cagayan de Oro ug Misamis Oriental kinahanglan magpakita og travel authority gikan sa Chief of Police sa istasyon kon asa kober ang barangay.
Ang requirement aron makakuha og travel authority mao ang medical certificate gikan sa Barangay og Municipal Health Office usa dalhon sa police station.
Kung mobiyahe gawas sa Misamis Oriental kinahanglan mokuha og travel authority sa Police Provincial Director sama sa mobiyahe pananglitan paingon sa Davao o lain dapit.
Dili kinahanglan ang travel authority kung moadto lang sa pikas lungsod sa Misamis Oriental pananglitan kung taga Tagoloan ug moadto lang sa lungsod sa Jasaan o Villanueva ang dili na kinahanglan magdala og travel authority.
Dili sab kinahanglanon ang travel authority kung usa ka sa sakop sa authorized person outside residence (Apor) o trabahante sa kompanya nga gitogotan nga mag-operate ubos sa modified general community quarantine ug mahimo ra nga identification card ang ipakita.
Si Police Major Ivan Viñas kinsa tigpamaba sa Cagayan de Oro City Police Office mipasabot nga kinahanglan ang travel authority nga kuhaon kung mobiyahe gawas sa siyudad.
"Kinahanglan ta og travel authority para diha malangan, halimbawa kung taga Carmen siya diha lang mokuha sa Carmen Police Station," pagklaro ni Viñas.