TUNGOD natigayon ang pagdeklara og lockdown sa mga utlanan sa mga probinsya, lalawigan ug siyudad atol enhanced community quarantine (ECQ) nga nagsugod bulan Marso 2020, daghan ang na-stranded sulod ug gawas sa Davao City.
Apan sumala ni Davao City Mayor Sara Duterte-Carpio dili na lisud-lisuron ang mga na-stranded sa ilang pag-agi sa mga checkpoints.
"Sa kadaghan og requirements sa locally stranded individuals, mas una pa makabyahe ang regular nga passengers. Sunda ninyo ang DILG (Department of the Interior and Local Government) kay ginasunod na sa ubang LGU nga naa i-require sa pagsulod sa mga tawo. Sa Davao City wala nata naga-require kay samot mo ma-stranded ana,” ingon ni Duterte-Carpio atol sa regular nga programa niini sa 87.5 FM dcDR, Hunyo 5.
Dugang niini nga health screening lamang ang kinahanglan sa pasahero sa pagsulod niini sa Davao City.
"Sa Davao City, we ask unsa ang kinahanglan sa mosulod. Ang importante is ang health screening upon arrival,” ingon ni Mayor Sara.
Luyo niini, mas maayo sab nga magdala nalang daan og health certificate gikan sa barangay nga gigikanan aron maoy ikapakita ugaling dunay mga checkpoint sa ubang siyudad ug lalawigan nga maagian sa pagbiyahe padung sa Davao City.
Gihangyo sa otoridad nga mas maayong dili mobiyahe kon mobisita lamang sa kabanay ang katuyoan aron malayo sa Covid-19.