SUPERBALITA CEBU

Labella: Bicycle lanes sa Cebu City

MAKABATON na unya og bicycle lanes ang dakbayan sa Sugbo aron mahimong luwas ang pagbiyahe sa mga Sugbuanon gikan sa posibleng disgrasya.

Si Mayor Edgardo Labella nipahibawo nga moumol og ad hoc committee ang City Government para maoy mohimo sa pagtuon. “Dedicated bicycle lane. Coming very soon in Cebu City,” padayag sa post ni Labella sa iyang Facebook page.

Ang maong komitiba langkuban nilang kanhi Cebu City south disrict Councilor Gerry Carillo, Konsehal Joel Garganera, LTO -7 Regional Director Vic Caindec, Cebu City Transportation Office Chief Alma Casimero ug Chairman sa Committee on Transportation sa City Council ug uban pa.

Lakip sa ilang ikonsiderar og asa nga mga dalan sa dakbayan ang butangan og bike lanes sanglit nakita sa mayor ang panginahanglan gumikan sa nag-anam og kadaghan sa mga nag-bike.

Si Labella nisuspenso sa gipatuman nga rehistrasyon sa CCTO alang sa mga magbiseklita sanglit gikonsiderar sa mayor nga ang ilang ibayad ngadto sa CCTO, magamit kini nila sa laing aspeto sanglit padayon nga nakasinati og kalisod ang siyudad ug ang katawhan tungod sa Covid-19.

Ang tumong pagrehistro sa biseklita para sa dali nga pag-ila sa nagmaneho niini hilabi na kon adunay mga dautang panghitabo.

Ang pamahayag sa mayor nigawas human giindosar sa Malacañang ang paggamit og biseklita niining panahon sa general community quarantine sa kaapike sa transportasyon. (PAC)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!