USA ka konsehal sa Barangay Looc, dakbayan sa Bais, Negros Oriental ang nasikop sa gihimong pagronda sa mga ahente sa Philippine Drug Enforcement Agency (PDEA) 7 ug kapulisan sa maong siyudad, Dominggo, Hunyo 7
Si Leia Alcantara, tigpamaba sa PDEA-7, miila sa nadakpan nga si Looc Barangay Councilor Romel Resente, 46, ug molupyo sa maong dapit, giposasan sa mga operatiba human sa positibo nga pagronda sa konsehal sa barangay.
Nasakmit gikan kang Resente ang upat ka pakete sa shabu nga motimbang og 2 gramos nga dunay kantidad nga moabot og P13,600 subay sa iyang Dangerous Drugs Board (DDB) value.
Nakuha usab gikan kang Resente ang usa ka kalibre .45 nga armas dunay magazine nga dunay sulod lima ka bala.
Nasuta usab nga dili lisensiyado ang armas.
Gidugang ni Alcantara nga si Resente gi-monitor sulod sa duha ka bulan sa mga ahente sa PDEA una giplano ang pagpangronda kaniya.
Samtang, dili mominus sa 20 gramos ang supply ni Resente matag semana sanglit nga ang uban niini gibaligya sa konsehal samtang ang ubang drugas, gigamit niya sa pangpersonal nga konsumo.
Kaso nga kalapasan sa pagpamaligya ug paghupot og drugas ang atubangon ni Resente subay sa kalapasan sa Akta Republika 9165.
Samtang, dugang sa PDEA 7, lain pang kaso ang atubangon niini tungod sa paghupot og armas nga walay lisensiya. (BBT)