LABING unang higayon, nakatala og positibo nga kaso sa Coronavirus disease 2019 (Covid-19) ang lungsod sa Medellin sa Hunyo 7, 2020.
Kini ang subo nga gipahibawo ni Medellin Mayor Joven “Benjun” Mondigo Jr.
Ang maong pasyente mao ang 59 anyos nga babaye nga taga Sitio EE, Barangay Kawit.
Matod ni Mondigo, wa na kini makapauli sa lungsod sukad Mayo 30 tungod kinahanglan siya nga magpa-dialysis matag semana.
Apan sa Hunyo 3, nipauli kini sa lungsod sakay sa pribado nga sakyanan apan nibalik ra kini pagka ugma aron magpa-check-up sa Vicente Sotto Memorial Medical Center (VSMMC).
Gipaubos dayon siya sa swab test ug diretso gi-admit sa nahisgutan nga ospital.
Tungod sa panghitabo gitigum sa mayor ang mga health ug uniformed personnel alang sa pagpahigayon na sa contact tracing sa lugar.
Isip protocol, ipaubos sa home isolation o usa ka isolation facility ang tanan nga nakahimamat sa pasyente.
Mohatag usab og ayuda ang pangagamhanan alang sa mga gikinahanglan niini. Hugot usab ang seguridad nga ipatuman sa lugar.
“Busa, akong kinasingkasing nga hangyo sa tanan nga magpabilin kita nga kalmado bisan niining maong balita. Apan atoang padayonon ang pagmatngon, pagmabinantayon ug hugot nga pagsunod sa tanan nga mga protocol aron dili makakatap ang maong sakit sa atong kabarangayan. Hugtan usab nato ang pag-ampo sa kahitas-an nga kita luwas kanunay sa makalilisang nga sakit,” matod ni Mondigo.
Samtang, tulo ka mga kaso sa Covid-19 sa lungsod sa Minglanilla. Dominggo, Hunyo 7.
Kini maoy gipahibawo sa lokal nga kagamhanan sa Minglanilla nga ang mga positibo nga kaso gikan sa usa ka subdivision sa Barangay Lower Pakigne ug Linao.
Sa samang adlaw, siyam na ka kaso sa Covid-19 sa sa dakbayan sa Talisay.
Kini maoy gikonpirmar ni Talisay City Mayor Gerald Anthony “Samsam” Gullas sa official Facebook page niini.
Ang mga pasyente gikan sa mga barangay Tanke, San Roque, Tabunok, Bulacao, Maghaway ug Lawaan 1 sa Talisay. (ANV)