UNANG adlaw sa General Community Quarantine (GCQ) niadtong Hunyo 1 sumad karong adlawa, apil ko sa panon sa mga tawo nga nagpainit aron lang makakita og masakyan padung sa kinapusoran sa dakbayan sa Sugbo.
Salamat sa mini bus nga may ruta nga Bulacao-Lapu-Lapu City, naabot ko sa akong tuyo balon ang di mapait nga kasinatian.
Sa downtown area, pipila lang sa mga establisemento ang nangabli. Sa mga nag-operate na, akong nabantayan nga nag-ulhos ulhos pagpangabot ang mga empleyado. Ang sulti sa gwardya dugay naabot kay way masakyan.
Kadaghanan nila nagbaktas taliwala sa naglagiting nga kainit sa adlaw. Nilampos man tuod ko sa biyahe padung sa downtown, lahi ang nahitabo pagbalik sa agi. Nadiindiin ko og pangita og masakyan.
Niadto ko dapit sa Carbon Market, sa dalan Colon, Sanciangko hangtod nga naabot ko sa dalan Leon Kilat. May panagsa nga tartanilla nga namasahero apan duha ra ka pasahero ang pasakyon mao nga naglisod ko.
Ang ginang sa akong kilid nga nagkabiba sa daghang kinumpra nisulti nako nga para Duljo siya. Mao to nga nihukom ko nga moapil nalang og sakay sa pamasin nga mahangyo ang kutsero nga molahos sa akong destinasyon nga mao ang Cogon Pardo.
Sa dihang nakasakay nako kauban kadtong ginang, wa nako maglangas. Ang naa sa akong hunahuna unsay akong itubag kong mangutana ang kutsero kong para asa ko.
Pag-abot namo duol sa Barangay Hall sa Duljo, nanaug ang ginang. Diha unta toy mopuli og sakay para Colon, nisulti ang kutsero nga mograhi na siya. Puerte nakong lipaya kay sa Laray, Inayawan ang iyang grahianan.
Unya maagian ra man ang amoa. Ang kutsero nga 27 ka tuig nang nagbahasbahas sa ruta nga Leon Kilat-Duljo mao si Edward Mejios, minyo ug upat ang anak.
Sa kadaghang butang nga among giestoryahan, ang isyu sa Social Amelioration Program kun SAP maoy nag-una sa tanan. Siya nangutana, nganong wa maapil sa listahan ang mga kutsero?
Sama niya nga dul-an sa tulo ka bulan nga wa ka biyahe, hilabihang lisora. Di baya ang kitaon sa kutsero ky mubo ra man sab og oras ang biyahe sa mga kabayo. Bitaw.
Sige tang panghambug nga ang tartanilla simbolo sa nindot ug mabulokon nga kagahapon sa Sugbo. Pero kong magkalisod na gani ang mga kutsero, kalimtan nalang sab sa dayon.
Iyang hangyo unta patas.
Kong naay programa para sa mga dricer sa dyip, iapil unta sila sama sa ayuda sa bugas. Di ba karong bag-o may mga driver sa dyip ang nakadawat og sinakong bugas? Gawas nila, ang mga drayber sa habal habal, trisikad ug e-bike ?